Ukrayina Silâlı quvetleriniñ Ava mudafaası saat 8:00-ge qadar 272 Rusiye uçucısızını (64-ü – reaktiv) zararsız alğa ketirdi, 20-den ziyade darbe uçucısızı daa avada qala – uruş işi devam ete, dep haber ete Ukrayina Silâlı quvetleriniñ Ava küçleri. Dronlarnıñ bir qısmını Rusiye ordusı Rusiye işğal etken Qırımnıñ Sarabuz qasabasından uçurdı.
Ukrayina arbiyleri 19 yerde ava ücümi vastalarınıñ darbesini qayd etti, 15 yerde parçaları tüşti.
Ukrayina Silâlı quvetleriniñ Ava küçleri malümatına köre, noyabrniñ 4-ne keçer gecesi (noyabrniñ 3-nde saat 18:00-den başlap) Rusiye ordusı Ukrayinağa 310 Shahed darbe uçucısızı (81-i – reaktiv), "Gerber", "Parodiya" taqlit dronlarınen Rusiyeniñ Orel, Kursk, Şatalovo, Millerovo, Primorsko-Ahtarsk ve vaqtınca işğal etilgen Donetsk ve Rusiye işğal etken Qırımnıñ Sarabuz qasabasından ücüm etti.
Rusiye arbiyleri Ukrayina regionlarına muntazam sürette ücüm ete, çeşit silâ qullana – uçucısız, raketa, KAB, reaktik toplu atış sistemaları.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tasnif ete ve olarnıñ maqsadı bar, dep qayd ete.
İnsanlarnı elektrik energiyası, sıcaq, su, bağ, tibbiy yardım ve yaşayış içün diger kerekli şaraitlersiz qaldırmaq içün eali yaşayışını teminlev sistemaları ve sağlıq müessiselerine qarşı ateşler genotsid areketleriniñ alâmetlerini taşıy.
Rusiye reberligi Rusiye ordusı büyük cenk vaqtında Ukrayinanıñ şeer ve köylerinde vatandaş infrastrukturasına qarşı darbe endirgenini, vatandaşlarnı öldürgenini ve hastahane, mektep, bala bağçaları, energetika ve suv obyektlerini yıqqanını inkâr ete.