Rusiye arbiyleri avgustnıñ 28-ne keçer gecesi Ukrayinağa 164 darbe uçucısızınen ücüm etti, dep haber etti Ukrayina Silâlı quvetleriniñ Ava küçleri. Dronlar Rusiyeniñ bir qaç yönelişinden, işğal etilgen Donetsk topraqlarından ve işğal etilgen Qırımnıñ Sarabuz qasabasından uçurıldı.
"İlk malümatqa köre, saat 09:00-ğa qadar ava mudafaası memleketniñ şimali, cenübi ve merkezinde Shahed, Gerber ve diger dronlar olğan 137 duşman uçucısızını urdı/bastırdı", – dep aytıla haberde.
Ukrayina Silâlı quvetleriniñ Ava küçleri bildirgenine köre, 16 yerde ücümler ve dört yerde parçalarnıñ tüşkeni qayd etildi.
Rusiye Federatsiyasınıñ arbiyleri şimdilik izaat bermedi.
Rusiye arbiyleri Ukrayina regionlarına muntazam sürette ücüm ete, çeşit silâ qullana – uçucısız, raketa, KAB, reaktik toplu atış sistemaları.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tasnif ete ve olarnıñ maqsadı bar, dep qayd ete.
İnsanlarnı elektrik energiyası, sıcaq, su, bağ, tibbiy yardım ve yaşayış içün diger kerekli şaraitlersiz qaldırmaq içün eali yaşayışını teminlev sistemaları ve sağlıq müessiselerine qarşı ateşler genotsid areketleriniñ alâmetlerini taşıy.
Rusiye reberligi Rusiye ordusı büyük cenk vaqtında Ukrayinanıñ şeer ve köylerinde vatandaş infrastrukturasına qarşı darbe endirgenini, vatandaşlarnı öldürgenini ve hastahane, mektep, bala bağçaları, energetika ve suv obyektlerini yıqqanını inkâr ete.