İyünniñ 30-ndan aqşamdan başlap Rusiye Federatsiyası Ukrayinağa işğal etilgen Qırımdan "İskander-M" ballistik raketası, Qara deñizden X-59 idare etilgen aviatsiya raketası ve 151 darbe dronınen ücüm etti, dep haber ete Ukrayina Silâlı quvetleriniñ Ava küçleri.
Ukrayina arbiyleriniñ aytqanına köre, ava ücümini Ukrayina Mudafaa quvetleriniñ aviatsiya, zenit raketa orduları, radioelektron küreş bölükleri ve uçucısız sistemalar, mobil ateş gruppaları keri qaytardı.
"İlk malümatqa köre, çarşenbe künü, iyulniñ 1-nde, saat 7:30-ğa qadar ava mudafaası Ukrayinanıñ şimali, cenübi ve şarqında idare etilgen X-59 aviatsion raketası ve 130 duşman dronını urdı/bastırdı. 16 yerde 17 darbe uçucısızınıñ ücümi ve dört yerde urulğanlarnıñ parçaları qayd etildi", – dep aytıla haberde.
Rusiye arbiyleri Ukrayina regionlarına muntazam sürette ücüm ete, çeşit silâ qullana – uçucısız, raketa, KAB, reaktik toplu atış sistemaları.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tasnif ete ve olarnıñ maqsadı bar, dep qayd ete.
İnsanlarnı elektrik energiyası, sıcaq, su, bağ, tibbiy yardım ve yaşayış içün diger kerekli şaraitlersiz qaldırmaq içün eali yaşayışını teminlev sistemaları ve sağlıq müessiselerine qarşı ateşler genotsid areketleriniñ alâmetlerini taşıy.
Rusiye reberligi Rusiye ordusı büyük cenk vaqtında Ukrayinanıñ şeer ve köylerinde vatandaş infrastrukturasına qarşı darbe endirgenini, vatandaşlarnı öldürgenini ve hastahane, mektep, bala bağçaları, energetika ve suv obyektlerini yıqqanını inkâr ete.