Rusiye ordusı martnıñ 10-na keçer gecesi (martnıñ 9-nda saat 18:00-den başlap) Ukrayinağa 137 darbeye uçucısızınen (tahminen 80-i – "Şahedler") ücüm etti, olarnı Rusiyede altı yönelişten ve Rusiye işğal etken Qırımnıñ Sarabuz qasabasından uçurdılar, dep haber etti Ukrayina Silâlı quvetleriniñ Ava küçleri.
İlk malümatqa köre, 08:00-ge qadar ava mudafaası 122 Rusiye uçucısızını zararsız alğa ketirdi.
Ukrayina arbiyleri 10 yerde 12 darbe uçucısızınıñ ücümini ve 10 yerde parçalarnıñ tüşkenini qayd etti.
Ukrayina Silâlı quvetleri ücüm devam ete, çünki ava boşluğında bir qaç Rusiye uçucısızı qala, dep qoşa.
Rusiye arbiyleri Ukrayina regionlarına çeşit silâ qullanıp muntazam surette ücüm ete.
Rusiye akimiyeti, Rusiye ordusı Ukrayinanıñ şeer ve köyleriniñ grajdan infrastrukturalarına, hastahaneler, mektepler, bala bağçaları, energetika ve suv teminlevi obyektlerine ücüm etkenini red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıdı ve olarnıñ maqsatlı olğanını qayd ete.