Rusiye ordusı Ukrayinağa yanvarniñ 13-ne keçer gecesi 25 raketa ve 293 darbe uçucısızınen ücüm etti, bir qısmı işğal etilgen Qırım yarımadasından uçurıldı, dep haber ete Ukrayina Silâlı quvetleriniñ Ava küçleriniñ komandanlığı.
Ukrayina arbiyleriniñ malümatına köre, 18 "İskander-M" ballistik raketası ve C-300 idare etilgen raketa Kursk, Brânsk, Voronej vilâyetlerinden ve işğal etilgen Qırımdan uçurıldı. Daa yedi "İskander-K" raketası Kursk ve Belgorod vilâyetlerinden uçurıldı.
Shahed, "Gerber" ve diger dronlar Kursk, Orel, Şatalov, Millerovo, Primorsko-Ahtarsk yönelişlerinde, Qırım yarımadasınıñ ğarbindeki Kaça qasabasından uçurıldı.
"Duşman Harkiv, Zaporijjâ, Dnipropetrovsk ve Kyiv vilâyetlerine dört yerden ballistikanen ücüm etti", – dep bildire Ukrayina komandanlığı.
Darbeni aviatsiya, zenit raketa ordusı, radioelektron küreş bölükleri ve uçucısız sistemalar ve mobil Ateş gruppaları keri qaytardı.
Ukrayina arbiyleri ava mudafaası memleketniñ şimali, cenübi, şarqı ve merkezinde 247 nişannı urıp tüşürdi, dep bildire:
2 "İskander-M" ballistik raketası
5 "İskander-K" qanatlı raketası
240 çeşit uçucısız.
"24 yerde ballistik/zenit raketa ve 48 darbe uçucısızınıñ darbesi qayd etildi", – dep qoşa Ukrayina Silâlı quvetleriniñ Ava küçleri.
Rusiye arbiyleri çeşit silâ qullanıp, muntazam sürette Ukrayina regionlarına ücüm ete.
Rusiye akimiyeti, Rusiye ordusı Ukrayinanıñ şeer ve köyleriniñ grajdan infrastruktursına maqsatlı darbelerini endirgenini red ete, sakinlerni öldürgenini ve hastahaneler, mektepler, bala bağçaları, energetika ve suv teminlevi obyektlerini yoq etkenini ayta.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıdı ve olarnıñ maqsatlı olğanını qayd ete.