Rusiye ordusı sentâbrniñ 23-ne keçer gecesi Ukrayinanıñ büyük şeerlerine qarşı ava bombaları ve uçucısızlarnı qullandı. Kyivde ücümler neticesinde eki avto yaqarlıq stantsiyasında, naqliyat infrastrukturası ve anbarda yanğınlar çıqtı. Üç kişi yaralandı, ekisi ağır alda hastahanege alındı.
Zaporijjâda sentâbrniñ 17-nde dron darbesiniñ nişanı olğan "Amstor" alış-veriş merkezi uçucısız ücümine oğradı. Yanğın çıqtı, eki insan yaralandı. Zaporijjâ vilâyetinde dronlar Kuşugum köyüne ücüm etti: mustaqil ev yoq etildi, saibi elâk oldı.
Harkiv vilâyetiniñ İzüm şeerinde bir balanen beraber yedi insan yaralandı, anda ava bombaları atıldı. Çoq daireli evler zarar kördi, yanğın çıqtı.
Sumı şeeri uzun mesafeli silâdan ateşke oğradı. Eki mustaqil ev ve eki vatandaş infrastruktura obyekti zarar kördi. Eñ az bir kişi yaralandı.
Poloniya ve Romaniya sıñırğa yaqın uruşlar sebebinden qırıcılarnı avağa kötermege mecbur oldılar.
Rusiye arbiyleri Ukrayina regionlarına muntazam sürette ücüm ete, çeşit silâ qullana – uçucısız, raketa, KAB, reaktik toplu atış sistemaları.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tasnif ete ve olarnıñ maqsadı bar, dep qayd ete.
İnsanlarnı elektrik energiyası, sıcaq, su, bağ, tibbiy yardım ve yaşayış içün diger kerekli şaraitlersiz qaldırmaq içün eali yaşayışını teminlev sistemaları ve sağlıq müessiselerine qarşı ateşler genotsid areketleriniñ alâmetlerini taşıy.
Rusiye reberligi Rusiye ordusı büyük cenk vaqtında Ukrayinanıñ şeer ve köylerinde vatandaş infrastrukturasına qarşı darbe endirgenini, vatandaşlarnı öldürgenini ve hastahane, mektep, bala bağçaları, energetika ve suv obyektlerini yıqqanını inkâr ete.