Ukrayina Tış işler nazirligi Rusiyeniñ yañı qorquzuvlarına cevap berdi.
Ukrayina Tış işler naziri Andriy Sıbiğa Rusiye Federatsiyası Tış işler nazirliginiñ beyanatını izaatlap, bugün 70-ten ziyade çetel diplomatik missiya vekilleri Kyivde Rusiye darbesiniñ yerlerini ziyaret etti.
"Ortaqlarımıznen Rusiyeniñ şantajı tesirine oğramamaq kerek, dep muzakere etemiz. Bularnı endi körgen edik ve o (Putin – muar.) bunı ne vaqıt aytqanını bilemiz .O, kerginleştirmege, bu "ğarbiy tüşüncelerge" tesir etmege tırışa. De özek qorquzuvları ve Beyazrusiyenen beraber talimler. Bu barışıq ğayretlerine külmek ola. İç bir barışıq esnasınıñ alâmetleri yoq, aksine kerginleştireler. Böylece, dünyanıñ cevabı proportsional olmalı", – dedi nazir Kyivde Beyazrusiye muhalifetiniñ lideri Svetlana Tihanovskayanen yapqan matbuat konferentsiyası vaqtında.
Onıñ aytqanına köre, Ukrayinağa yardım aqqında aytıla, çünki istilâcı Rusiye ciddiy muzakerelerden vazgeçkeniniñ aqibetlerini añlamaq kerek.
"Bugün ortaqlarımıznen bu sert cevapnı muzakere ettik. Lafta degil, neler yapa bilecegimizni – Avropa qorqmay, böyle qorquzuvlarğa ne yapacağımıznı bilgenimizni köstermek. Proportsional ve küçnen", – dep qoştı Sıbiğa.
Mayısnıñ 25-nde Rusiye Tış işler nazirligi Kyivde "qararlar alınğan merkezlerge ve komandanlıq noqtalarına" qarşı darbelerni ilân etti. Rusiye nazirligi "çetel vatandaşlarını, şu cümleden diplomatik missiya ve halqara teşkilâtlarnıñ vekillerini" şeerni tez terk etmek kerek, dep tenbiley.
Mayısnıñ 24-nde gece Ukrayina Rusiyeniñ kütleviy ücümine oğradı. Ukrayina Silâlı quvetleriniñ Ava küçleri malümatına köre, Rusiye ordusı Ukrayinağa 600 çeşit uçucısız ve 90 ava, deñiz ve qarada olğan raketanen ücüm etti, darbeniñ esas yönelişi Kyiv oldı. Umumen Ukrayinada dört kişi elâk oldı, yüzge yaqın insan yaralandı.
Şevçenko, Darnıtsâ, Desnânskıy, Obolon ve Ğolosiyıvskıy rayonlarında 49-дan ziyade yerde zararlar qayd etildi.
İç işler nazirliginiñ malümatına köre, Kyivde ücüm sebebinden çoq daireli ve mustaqil evler, alış-veriş merkezleri, oquv yurtları, bazar, Devlet fevqulâde vaziyetler hızmeti ve polis memuriy binaları, Çernobıl Milliy müzeyi zarar kördiler.
Rusiye Mudafaa nazirligi "Ukrayinanıñ arbiy idare, ava bazaları veye mudafaa-sanayı kompleksiniñ müessiselerine qarşı" dron ve raketalar, hususan "Oreşnik" ballistik raketalarınen kütleviy ücüm yapqanını bildirdi.