Keçken künü Rusiye istilâsı neticesinde dört vilâyette üç kişi elâk oldı, daa 10 insan yaralandı, dep haber ete yerli akimiyet.
Vilâyetniñ arbiy memuriyet yolbaşçısı Vâçeslav Çausnıñ malümatına köre, Çerniğiv vilâyetinde tünevin kündüz FPV-dronınıñ Semenovkağa qarşı darbesi sebebinden o an maşina aydağan 47 yaşında qadın yaralandı – hastahanege oğradı.
Keçken künü Harkiv ve Harkiv vilâyetiniñ yedi mesken yeri Rusiye darbelerine oğradı, beş kişi Rusiye atışlarından zarar kördi. Yerli akimiyetniñ malümatına köre, Zoloçev qasabasında 29 qadın yaralandı, Kovşarovka qasabasında 67 yaşında erkek, Slatino qasabasında 74 yaşında erkek, Yürçenkovo 22 yaşında erkek, Hatnoye köyünde 53 yaşında qadın yaralandı.
Zaporijjâ vilâyetiniñ arbiy memuriyet yolbaşçısı İvan Fedorov bildirgenine köre, Rusiye Federatsiyasınıñ quvetleri keçken künü vilâyetniñ 36 mesken yerine 785 darbe endirdi. Ücüm neticesinde bir kişi elâk oldı, eki insan yaralandı.
Herson vilâyetinde 12 mesken yer, hususan vilâyet merkezi Rusiye ücümlerine oğradı. Rusiye istilâsı sebebinden eki insan elâk oldı, eki kişi yaralandı, dep haber etti vilâyetniñ arbiy memuriyet yolbaşçısı Oleksandr Prokudin.
Rusiye arbiyleri Ukrayina regionlarına çeşit silâ qullanıp muntazam surette ücüm ete.
Rusiye akimiyeti, Rusiye ordusı Ukrayinanıñ şeer ve köyleriniñ grajdan infrastrukturalarına, hastahaneler, mektepler, bala bağçaları, energetika ve suv teminlevi obyektlerine ücüm etkenini red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıdı ve olarnıñ maqsatlı olğanını qayd ete.