Orta küzniñ 12-nde aqşam Rusiyeniñ Harkivge endirgen ücümi neticesinde Holdonogorsk rayonında beş qatlı ev zarar kördi, dep bildirdi yerli akimiyet vekilleri.
"Mesken evniñ qısmen viran etilmesi. Yanğın çıqtı", — dep qısqaca haber etti OVA başı Oleg Sinegubov.
"Çoq ciddiy bozuvlar oldı", — dep qayd etti Harkiv şeer başı İgor Terehov saat 22:24-te.
Sinegubov saat 22:38 beş insan yaralandı, tibbiy yardım kösterilmekte, dep bildirdi.
Bugün saba Harkivniñ Holdonogorsk rayonında evniñ viraneleri tübünde üç adamnıñ cesedi tapıldı, dep bildirdi vilâyetniñ arbiy memuriyetiniñ yolbaşçısı Oleg Sinegubov.
Qaza yerinde bütün acele hızmetler çalışa. Qıdıruv ameliyatı devam ete.
Şeer yolbaşçısı İgor Terehovnıñ bildirgenine köre, şimdilik gece atışından zarar körgen on kişi aqqında belli.
Qurtarıcılarnıñ qayd etkenine köre, viraneler altında insanlar buluna bile.
Rusiye arbiyleri Ukrayina regionlarına muntazam sürette ücüm ete, çeşit silâ qullana – uçucısız, raketa, KAB, reaktik toplu atış sistemaları.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tasnif ete ve olarnıñ maqsadı bar, dep qayd ete.
İnsanlarnı elektrik energiyası, sıcaq, su, bağ, tibbiy yardım ve yaşayış içün diger kerekli şaraitlersiz qaldırmaq içün eali yaşayışını teminlev sistemaları ve sağlıq müessiselerine qarşı ateşler genotsid areketleriniñ alâmetlerini taşıy.
Rusiye reberligi Rusiye ordusı büyük cenk vaqtında Ukrayinanıñ şeer ve köylerinde vatandaş infrastrukturasına qarşı darbe endirgenini, vatandaşlarnı öldürgenini ve hastahane, mektep, bala bağçaları, energetika ve suv obyektlerini yıqqanını inkâr ete.