Rusiye Federatsiyasınıñ Ulyanov vilâyetiniñ Çerdaklin rayonında №302 "Moskva – Çelâbinsk" yolcu treniniñ altı vagonı çıtadan çıqtı. Bundan evel Rusiye demiryollarınıñ matbuat hızmeti sekiz vagon aqqında bildirgen edi.
Qaza saat 06:26-da Brândino stantsiyasınıñ rayonında oldı. Uquq qoruyıcılarğa yaqın Mash telegram kanalı yazğanına köre, tren içinde 415 insan bar edi.
Çelâbinsk vilâyetiniñ valisi Aleksey Teksler elâk olğanlar yoq, dep bildirdi.
"İlk malümatqa köre, 2 yolcunıñ sınıqları bar: biriniñ ayağı sındı, digeriniñ köpürçik kemiginde sınıq bar. 20 insannıñ ezikleri bar, bir balanıñ ayağı ezildi", – dep yazdı o.
Areket toqtatıldı. Şirket yaralanğanlar malümatını almağa tırışa. Qaza aqibetlerini yoq etmek içün adise yerine yardımcı trenler yol aldı. Qaza sebepleri ögrenile.
Ulyanov vilâyetiniñ valisi Aleksey Russkih bildirgenine köre, qaza yerine acele yardım ve felâket tibbiyeti brigadaları yol aldı.