Rusiyede "Qırım musulmanları davası" boyunca mahküm etilgen Teymur Abdullayevni ŞİZO-dan cezahaneniñ umumiy barakına avuştırğanlar. Bunı "Qırım birdemligi" oğlu ile körüşip olğan Abdullayevniñ anası Dilâra hanımağa atfı etip bildirmekte.
Körüşüv vaqtında Abdullayev ceza izolâtorından dekabrniñ 18-nde çıqqanını aytqan. Anda, o, 55 kün keçirgen.
"Qadınnıñ aytıp bergenine köre, Abdullayevniñ çırayı pek hasta - köz yuvarları sarı, bu da öz nevbetinde qara ciger ile problemalar olğanını köstere, özü siyasiy mabüs ise sırt ve büyrek ağrısından aytınğan", - dep yazıla bildirmede.
Dilâra Abdullayeva bildirdi ki, olğlunda zeerlenüv ve suvsızlıq alemetleri bar.
Bundan ğayrı, o, cezahane müdiri ile apayınen körüşüvge izin berilmesini muzakere etken. Apayınen Teymur endi aman-aman 5 yıl körüşmegen.
Oktâbrniñ 24-nde Teymur Abdullayevniñ anası Dilâra Abdullayeva Facebook saifesinde oğlu kene ceza izolâtorına qapatıldı, dep bildirdi. Ukraina ombudsmanı Lüdmila Denisova Teymur Abdullayevniñ ceza izolâtorına qapatıluvını «işkence» dep adlandırdı.
Teymur Abdullayev bir yıldan ziyade Rusiyeniñ Salavat şeerindeki koloniyanıñ ceza izolâtorlarında tutuldı. Ceza izolâtorınıñ memuriyetiniñ versiyasına köre, o, tutuv rejimini muntazam tarzda bozğan. İyünniñ başında, advokatları ve tuvğanlarınıñ ğayreti sayesinde onı ŞİZO-dan çıqardılar.
Dilâra Abdullayeva iyülniñ 28-nde Kyivde Ukraina prezidentiniñ ofisi ögünde bir kişilik narazılıq aktsiyasını ötkerdi. O, başlıqlardan oğullarınıñ – Ukraina vatandaşlarınıñ azat etilmesi meselesinden ne iş körgenleri aqqında malümat bermege talap etti.
Rostov-na-Donunıñ Cenübiy okrugınıñ arbiy mahkemesi bu davanıñ mabüslerine 2019 senesi iyün ayında üküm çıqardı. Daa soñra Rusiye Yuqarı mahkemesi qırımlılarnıñ ükmüni deñiştirdi.
Uzeir Abdullayev 12 yıl ve 6 ay, Rustem İsmailov 13 yıl ve 6 ay, Emil Cemadenov 11 yıl ve 6 ay, Ayder Saledinov 11 yıl ve 6 ay apis cezasını aldı. Teymur Abdullayevniñ ükmü ğayrıdan baqılğan soñ, onı 16 yıl ve 6 ayğa üküm ettiler, onıñ içün 1 yıl ve 4 ay müddetinen memuriy nezaret belgilendi.
Ukraina Tış işler nazirligi bu davağa qarşı narazılıq bildirip, Rusiyege qarşı sanktsiyalarnı quvetleştirmege çağırğan edi.
«Memorial» aq qorçalayıcı merkezi bu davanıñ bütün mabüslerini siyasiy mabüs dep tanıdı.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.