Rusiye radio stantsiyaları Qırım şimaliniñ çoqusı köy-qasabasında ukrain FM-sıqlıqlıqlarını elge keçirdi. Bunı “Qırım uquq qoruyıcı gruppası” 2019 senesi mayısta keçirgen monitoring neticeleri köstere.
Böylece, yarımada şimalinde 8 qasabada bütün ukrain sıqlıqlarını Rusiye stantsiyaları zapt etti. Daa 11 qasabada qısmen ukrain yayınlavı bar, amma çoqusı sıqlıqlarda Rusiye stantsiyaları eşitile. Ukraina nezaretindeki “Çonğar” ve “Çaplınka” kiriş-çıqış noqtalarında eki Rusiye radio stantsiyasınıñ signalları eşitile, dep qayd ete uquq qoruyıcılar.
“Daima artıp turğan Qıımnıñ haber izolâtsiyası söz serbestligini bozğanından ğayrı, işğalci devletke yarımadada adam aq ve serbestligini ileride de bozmaq içün yol aça. Böyle areketler qısqa vaqıtta toqtatılmalı, ukrain mustaqil mediasınıñ yarımadada yayınlavı ise ğayrıdan tiklenmeli, ve ukrain radio sıqlıqlarını qanunsız elge keçirgenler cezalanmalı”, - denile beyanatta.
“Qırım uquq qoruyıcı gruppası”, 1947 senesi Halqara elektrik bağ şartnamesi ve 1950 senesi BMT Baş Assambleyası tarafından radio sıqlıqlarınıñ söndürilüvi takbih etildi, dep bildire.
Ukrainanıñ Milliy içtimaiy radio şirketi ile beraber de ilhaq etilgen Qırımda orta AM dalğalarındaki 549 kHz sıqlığında eşittirüvlerini yayınlağan Qırım.Aqiqat Radiosı, 2017 senesi sentâbrniñ 4-nden başlap, FM diapazonınıñ 105,9 MHz sıqlığında künde 24 saat içinde Qırım içün radioeşittirüvlerini translâtsiya etmege başladı. Ukrainanıñ Şarqındaki şeerlerde FM diapazonında çalışqan ve Ukrainanıñ Dünya radio hizmetiniñ orta dalğalarında (1431 kHz) radioeşittirüvlerini yayınlağan Donbass.Aqiqat Radiosı leyhası, 2016 senesi yanvarniñ 23-nden başlap, Donetsk ve Lugansk vilâyetleriniñ Ukrainanıñ kontroli altında olmağan rayonları içün yayınlarını translâtsiya ete.