Noman Çelebicihan adına 48-nci ayrı ücüm batalyonınıñ daa bir ukrayinalını Rusiyede "terrorizmde" qabaatlaylar. Söz, 2024 senesi orta küz ayınıñ 18-nden berli esirlikte bulunğan ve Rusiye kontrolindeki Çonğardaki 2-nci SİZO-da tutulğan qırımtatar Seyran Asanov aqqındadır, dep bildirdi Qırımtatar resurs merkeziniñ yolbaşçısı Eskender Bariyev.
Onıñ malümatına köre, Asanov batalyonğa 2024 senesi arman ayınıñ 26-da alındı, Donetsk vilâyetiniñ Volnovaha rayonınıñ Zolotaya Niva meskün yerinde esirlikke tüşti. Rusiye akimiyeti onı "terrorizmde" qabaatlay ve 20 yılğa qadar apis cezasını belgilemekni planlaştıra.
"Soñki eki afta içinde bu, Rusiye Federatsiyasında ukrayin cenk esirleri qanunsız mahkeme etilgen ekinci adisedir. Birincisi Sergey Yatskov edi, onı Çelebicihan batalyonında iştirak etkeni içün 20 yılğa üküm ettiler", — dep qayd etti Bariyev.
QRM-niñ malümatına köre, Asanov ve batalyonnıñ diger mabüsleri III Jeneva konventsiyasına köre cenk esirleri.
Bariyev, ukrayinalı esirlerge qarşı qabaatlavlar kerçek cinayetlerni tasdıqlap olamağan "delillerge" esaslana, dep bildirdi.
"Bu davalarnıñ resmiy "delilleri" içtimaiy ağlardaki yazılar, fotolar ya da gizli şaatlarnıñ ifadeleri ola. Bu, halqara uquq ve insan aqlarını boza", — dep qoştı o.
QRM-niñ malümatına köre, Noman Çelebicihan batalyonında iştirak etüv içün Rusiye akimiyeti eñ az 66 insannı yaqaladı: 19 — Qırımda ve 47 — Herson vilâyetinde.