Rusiye arbiy istinav mahkemesi "Qırım musulmanları davasınıñ" "uçünci Canköy gruppasında" qabaatlanğan – Nariman Ametov, Ali Mamutov, Vohid Mustafayev, Enver Halilayev içün ükümni deñizmesi qaldırdı. Bu aqta "Suspilne Krım" telekanalınıñ saytı ve haber portalı Rusiyeniñ TASS devlet haber agentligine atıf etip haber ete.
"Mahkeme Ametov Nariman Delâveroviç , Mamutov Ali Rizayeviç , Mustafayev Vohid Enveroviç ve Halilayev Enver Remziyeviçniñ istinafını baqtı. Birinci instansiya qararı deñizmesi qaldı", — dep aytıla Rusiyeniñ Arbiy devlet mahkemesiniñ qararında.
"Qırım. Aqiqat" evelden haber etti ki, 2026 senesi Quralaynıñ 21 künü Rusiyeniñ Rostov-na-Donu şeerindeki Cenübiy rayon arbiy mahkemesi olarnı "Hizbut-Tahrir" faaliyetini teşkil etüvde ve faaliyetinde iştirak etüvde ve akimiyetni elge almağa tırışmaqta qabaatlap, uzun müddetli apis cezasına mahküm etti. İmam Remzi Qurtnezirovğa 20 yıl, Nariman Ametovğa 15 yıl, Enver Halilayevge 14,5 yıl, Vohid Mustafayev ve Ali Mamutovğa 14 yıl apis müdeti berildi.
Hatırlatamız ki, 2024 senesi Sabannıñ 5 künü sabasında Rusiye telükesizlik quvetleri ilhaq etilgen Qırımnıñ Bağçasaray ve Canköy rayonlarında 10 Qırımtatarnıñ evini tintti. Tutulğanlar arasında yerli sakinler Ali Mamutov, Canköyden kelgen qurucı Enver Halilayev, Nariman Ametov, imam Vohid Mustafayev, sabıq imam Remzi Qurtnezirov, faal Arsen Kaşka bar ediler.