Rusiye quvetçileri 2025 senesi oraq ayında Moskvanıñ Domodedovo ava limanında tutulğan 31 yaşındaki Qırımlı Kirill Kostigovnı "devlet hainliginde" qabaatladı. Olarnıñ malümatına köre, Kostigov Ukrayin hayriye teşkilâtlarına para yollağan eken, dep yaza Qırımtatar resurs merkezi Human Rights in Ukraine-ge atıf etip.
"Pervıy ootdel" aq qorçalayıcı teşebbüsiniñ malümatına köre, FSB hadimleri oraq ayınıñ 14-nde telefonını teşkergen soñ onı tuttı. Cinayet taqipiniñ temeli olaraq 2 biñ ruble miqdarında qayd etilgen yollamalar oldı.
"Rusiye telükesizlik hadimleri Kostigovğa qarşı "karusel" memuriy apis cezalarını qullanğanlar — 2025 senesi oraq-arman aylarında apishanede tutmaq içün biri-biri artından "kiçik huliganlıq" qabaatlarlarını uydurğanlar. Tek ilk küz ayında işğalci organlar onı Rusiye Ceza kodeksiniñ 275 maddesine istinaden (devlet hainligi) siyasiy sebeplerden qabaatladılar, bundan soñ Moskvanıñ Meşçhan mahkemesi onı apiske aldı", — dep yaza QRM.
Belli olğanı kibi, Kirill Kostigov işğal etilgen Qırımnıñ Keriç şeerinde doğdı. Anası Ukrayinada yaşay, Rusiyede ise onıñ soy-sopları yoq. Kostigovnıñ vaziyetke dair açıq izaatları daa yoq. Eger qabaatı isbatlansa, oña 12 yıldan 20 yılğa qadar apis cezası berilecek. Rusiye quvetçileri vaziyetni izaatlamadı.