Soñki bir buçuq kün içinde Moskvada yol-naqliyat hızmetiniñ hadimleri, Qırımda "Hizb ut-Tahrir" teşkilâtına alâqası bar olğanında şübheli sayılıp apiske alınğan Esma Nemetullayeva, Nasiba Saidova, Elviza Aliyeva ve Fevziye Osmanovanıñ cinaiy davası sebebinden Rusiye ombudsmanı Tatyana Moskalkovanıñ qabulına yollanılğan qırımlılarnıñ eyyetini beşinci kere toqtattı. Bu aqta "Qırım birdemligi" cemaat birleşmesi eyyet iştirakçilerine atfı etip yaza.
Beyanatqa köre, Moskalkovanıñ ofisi bulunğan yerge beş daqqa qala edi. Yol polisi hadimleri maşnanı toqtattılar, bütün yolcularnıñ pasportlarını teşkermek içün aldılar. Taksi maşnasını quvetçiler benzin stantsiyasına keçmege mecbur ettiler. Daa soñra eyyetniñ azalarına vatandaş urbasında Skoda Octavia maşnasınen kelgenler. Tutulğanlar, ne sebepten toqtatılğanını ve ne sebepten vesiqaları berilmegenini ögrenmege tırıştılar, amma Rusiye quvetçileri bu suallerge cevap bermedi.
Soñki künde eyyetni Rusiyeniñ farqlı regionlarında uquq qoruyıcı organlarınıñ hadimleri endi dört kere toqtattılar ve yaqaladılar.
Delegatsiya erkânında 16 insan bar, olarnıñ arasında daa evel apiske alınğan qırımlılarnıñ ana-babaları, adliyeci Nazim Şeyhmambetov, qırımtatar halqınıñ faalleri ve aqsaqalları bar.
Orta küz ayınıñ 15-nde Rusiye quvetçileri Qırımda dört qırımtatar qadınını tutıp, olarnı Rusiye Ceza kodeksiniñ 205.5 maddesine istinaden (terror teşkilâtınıñ faaliyetinde iştirak etüv) "Hizb ut-Tahrir" davası boyunca qabaatladı.
Tutulğanlar arasında Esma Nimetulayeva, beş balanıñ anası ve siyasiy mabüsniñ apayı; Nasiba Saidova, bala bağçasında çalışqan student; Elviza Aliyeva ve Fevziye Osmanova.
Orta küz ayınıñ 16-nda Aqmescitteki Rusiye kontrolindeki Kiyev rayon mahkemesi dört kişini eki ayğa SİZO-ğa yolladı.