Rusiye quvetçileri Qırımnıñ Cenübiy yalısındaki Degirmenköy köyüniñ 52 yaşında sakini "İyegova şaatları" diniy teşkilâtınen alâqası olğanı içün tutuldı, dep bildirdi. Bu aqta Qırım boyunca Rusiye Tahqiqat komitetiniñ idaresi ve Rusiye kütleviy haber vastaları Rusiye FSB-sine atıf etip bildire.
Qayd etilgenine köre, tintüv vaqtında yaqalanğan kişide Rusiye akimiyeti tarafından yasaq etilgen edebiyat tapıldı. Rusiye FSB-siniñ bildirgenine köre, erkek Aluştada ve Yaltada teşkilâtnıñ faaliyetini idare etip, anda toplaşuvlar keçire edi.
Tutulğan kişiniñ adı ve soyadı aydınlatılmay, onıñ açıq izaatları da yoq. "İyegova şaatları" teşkilâtınıñ resmiy temsilcileri bu yaqalanuv aqqında şimdilik izaat bermediler.
"KrımSOS" aq qorçalayıcı teşkilâtınıñ talilcisi Yevğen Yaroşenko, Rusiye quvetçileri 2024 senesiniñ başından berli Rusiye tarafından işğal etilgen Qırımda eñ azından 15 kere "İyegova şaatları" diniy teşkilâtınıñ temsilcileriniñ evlerinde tintüvler keçirdi, dep bildire edi.
"İyegova şaatları" Avropa assotsiatsiyasınıñ malümatına köre, soñki 7 yıl içinde Qırımda 30 din adamı diniy sebeplerden taqip etildi.