Rusiye quvetçileri Herson vilâyetiniñ Geniçesk rayonınıñ Novodmitrovka köyüniñ sakini Asan Baynı 2024 senesi sentâbr ayında Çonğar kiriş noqtasında tutıp, Noman Çelebicihan qırımtatar batalyonında iştirak etkeninde qabaatladı. Bunı Qırımtatar resurs merkezi bildire.
Yedi ay devamında erkek SİZO-da buluna, Rusiye akimiyeti ise onıñ tuvğanlarına tutulğanı aqqında malümatnı aşkâr etmekni yasaq ete.
Yaqalanğannıñ tanışları, Asan Bay sakin ve siyasiy olmağan bir insan olğanını ve iç bir vaqıt narazılıq aktsiyalarında ya da arbiy birleşmelerinde iştirak etmegenini qayd eteler. Buña baqmadan, Rusiye onı qabaatladı ve apiske aldı.
"Qırımtatar Resurs Merkezi tınç ealige qarşı sebepsiz repressiyalarnı takbih ete ve Asan Baynıñ acele azat etilmesini talap ete. Halqara toplulıqnı işğalci akimiyet tarafından insan aqlarınıñ bozulmasına diqqat ayırmağa ve qanunsız tutuvlarnı toqtatmaq içün Rusiyege qarşı basqını quvetleştirmege çağıramız", — dep aytıla beyanatta.
Daa evel QRM haber etkenine köre, 2014 senesinden başlap, "Noman Çelebicihan" qırımtatar batalyonında iştirak etkeninde qabaatlanıp, eñ azından 51 insan yaqalandı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.