"Terroristik teşkilâtta iştirak etkeninde" qabaatlanıp, beş yılğa azatlıqtan marum etilgen ve şimdiki vaqıtta Moskvanıñ 5-nci SİZO-sında bulunğan on altı yaşındaki Rusiye mektep talebesi Arseniy Turbin yedi künge kartserge qapatıldı. Bu aqta "Memorial" haber ete.
Bu, Turbinniñ izolâtorda alğan ekinci cezasıdır. Sentâbrniñ soñunda onı kartserge endi yollağan edileer, çünki o "kameradaşı ile qavğa etken edi". Şimdi, gençniñ anası aytqanı kibi, ceza içün resmiy sebep "yuqlama vaqtı kelgen soñra kameradaşı ile laf etkeni" olğan.
İyün ayında Arseniy Turbin arbiy mahkeme tarafından azatlıqtan marum etilüvge mahküm etildi. Tahqiqat vaqtında o 15 yaşında edi. Mahkeme qararına köre, 2023 senesi yazda Turbin Ukrayina Silâlı quvetleri tarafında cenkleşken "Rusiye Azatlığı" legionına qoşuldı, bundan soñ bu teşkilâtnıñ adı bildirilmegen vekiliniñ avalesinen Vladimir Putinge qarşı levhalarnı poçta qutularına tarattı. Mektep talebesi mahkemede, legionğa kirmegenini, beyannamelerni ise şahsiy fikirleri içün tarqatqanında israr etti. "Mediazona" malümatına köre, Turbinge qarşı cinaiy dava FSB hadimleri tarafından sahteleştirilgen sorğu protokolı esasında uydurılğan.
Oktâbr ayında Turbin SİZOdan yazğan mektübinde onı köteklegenlerini bildirdi. Gençniñ aytqanına köre, oña bir qaç kere ücüm etken ve "başını yumruqnen urğan" Azizbek adlı kameradaşıdır. Turbin kameradaki vaziyetni özü içün "kritik" dep adlandıra edi. Mektep talebesiniñ anası, Arseniy SİZO-da 17 kilogramm azdı, dep tarif etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.