Rusiye prokurorı Rostov-na-Donu Cenübiy okrugınıñ arbiy mahkemesinden qırımtatar faali, «qırımlı musulmanlar davasınıñ» mabüsi Ansar Osmanov içün 18 yıl apis cezası berilüvini talap ete. Bu aqta «Qırım birdemligi» haber ete.
«Devlet qabaatlayıcısı Sergey Aydinov munaqaşada «Osmanovnıñ qabaatı isbatlandı» dep, Rusiye devlet qabaatlavı istegen cezanı seslendirdi – 18 yıl sert rejimli koloniyada qalması. 47 yaşında Ansar Osmanov ilk 4 yılnı eñ sert şaraitlerde – apishanede keçirecek», – dep aytıla haberde.
Terrorizm qabaatlavlarına baqmadan, Osmanovnıñ dava malümatında silâ, patlayıcı saqlanması ya da terakt yapmağa azırlanması aqqında aytılmay, dep qayd ete aq qorçalayıcılar.
«Hizb ut-Tahrir» aqqında aytıp, bu teşkilâtnıñ faaliyeti aqqında bile, dep bildirdi. Onıñ fikirince, Rusiye bu teşkilâtnı qanunsız bir şekilde terror teşkilâtı dep tanıdı. O, ağaçnen çalışıp para qazanğanını ayttı. Bir qaç balası bar. Ne cinaiy, ne de başqa bir mesüliyetke çekilmegen edi. Namuslı bir adam», – dep qayd etti advokat Emil Kurbedinov.
Qabaatlav hulâsasında dava mabüsi Ernest Seytosmanovnıñ evinde yapılğan ses qaydları bar. «Qırım birdemligi» qayd etkenine köre, imaye tarafınıñ mütehassısı bu subetlerde zorbalıq ya da terrorizm çağıruvlarını körmedi.
Nevbetteki mahkeme oturışuvı martnıñ 28-ne belgilendi.
Osmanov 2022 senesi fevral ayında keçirilgen tintüvlerden soñ tutuldı. O vaqıt Qırımnıñ bir qaç rayonında Rusiye uquq qoruyıcıları dört insannı tutqan edi: Ansar Osmanov, Marlen Mustafayev, Ernest Seytosmanov ve Amethan Abdulvapov.
Tutulğanlar Rusiyede terrorist tanılğan, amma bir çoq memlekette milliy qanunlar seviyesinde sıñırsız çalışqan «Hizb ut-Tahrir» siyasiy firqasında iştirak etkeninde qabaatlandı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.