Rusiye prokuraturası terrorizmge çağırğanında qabaatlanğan kezlevli sol faal Yevgeniy Karakaşevni 9 yıl umumiy rejim koloniyasında qalmasına üküm etmege çağırdı. Bu aqta Qırım.Aqiqat mühbiri mahkeme salonından haber ete.
Bugün Rostov-na-Donudaki Şimaliy-Kavkaz okrugınıñ arbiy mahkemesinde Karakaşevniñ davasında taraflarnıñ munaqaşaları başlandı.
Devlet qabaatlayıcısı sözge çıqıp, Yevgeniy Karakaşev qabaatını tanımasa da, qabaatı esnasta isbatlandı, dep bildirdi.
Prokurornıñ fikirince, Karakaşevniñ qabaatını tintüv ve operativ-qıdıruv tedbirleriniñ prokotolları, tilşınasnıñ qararı, qabaat şaatı Sergey Vasilçenkonıñ ve Rusiye arbiy şaatlarınıñ malümatı isbatlay.
Devlet qabaatlayıcısı yımşatuv sebeplerini qayd etmeyip, Yevgeniy Karakaşevni Rusiye Ceza kodeksiniñ 205.2 maddesiniñ 1-inci ve 2-nci qısımlarına köre qabaatlı tanımağa ve 9 yıl umumiy rejim koloniyasına qalmasına üküm etmege rica etti. Prokuror qoşma ceza olaraq Karakaşevge «elektron ya da informatsion-telekommunikatsion ağları, şu cümleden «İnternet» qullanuvınen saytlarnıñ idare etilmesinen bağlı faaliyetni» yasaqlamağa rica etti.
Şimdi munaqaşalarda Yevgeniy Karakaşevniñ menfaatlarını temsil etken «Agora» halqara aq qorçalayıcı gruppasınıñ advokatı Aleksey Ladin çıqışta buluna, dep bildire Qırım.Aqiqat mühbiri.
Aprelniñ 12-nde Rusiyeniñ Rostov-na-Donu şeerindeki Şimaliy-Kavkaz okrugınıñ arbiy mahkemesinde terrorizmge çağırğanında qabaatlanğan Yevgeniy Karakaşev qabaatını kene red etip, davanıñ siyasiy sebepleri bar, dedi.
Daa evel Rostov-na-Donudaki Şimaliy-Kavkaz okrugınıñ arbiy mahkemesi Karakaşevniñ «VKontakte» içtimaiy ağında bir de bir içtimaiy gruppağa nefret doğuruv (Rusiye Ceza kodeksiniñ 282-nci maddesiniñ 1-inci qısmı) davasını toqtattı. Bu oturışuvda mahkeme Karakaşevniñ SİZOda tutuluv müddetini 2019 senesi iyülniñ 14-ne qadar da uzattı.
2018 senesi fevralniñ 1-nde Rusiye Tahqiqat komitetiniñ hadimleri Karakaşevni Kezlevde tutıp, içtimaiy ağlarda ekstremist laflar aytqanından şübheli sayğan edi. Daa soñra mahkeme onı tevqif etti. Karakaşev oña qarşı qabaatlav sahte ola ve uydurılğan dep tüşüne.
Aqyarda «Karakaşevniñ davası boyunca» sol faaller Aleksey Şestakoviç, Aleksey Prisâjnük, İgor Panüta, İvan Markov ve Artem Vorobyevniñ evlerinde tintüvler keçirilgen edi.