Rusiye Mudafaa nazirligi yanvarniñ 9-na keçer gecesi Ukrayinağa qarşı darbe içün "Oreşnik" orta mesafeli ballistik raketasını qullandı, dep tasdıqladı.
Rusiye Mudafaa nazirligi bildirgenine köre, "darbe maqsadlarına irişildi", energetik infrastruktura obyektleri olardan biri olaraq aytıldı.
Rusiye müessisesi bunı Ukrayinanıñ Rusiye lideri Vladimir Putinniñ Novgorod vilâyetindeki rezidentsiyasına qarşı darbesine cevap dep adlandırdı. Rusiye tarafı Ukrayina arbiyleri bu darbeni dekabrniñ 29-na keçer gecesi endirdi, dep bildire. Amma Ukrayina ve ittifaqdaşları bunı inkâr ete. Prezident Volodımır Zelenskıy Moskvanı Kyivge qarşı yañı darbelerni aqlamaq içün sahte malümat qullanğanında qabaatladı. AB çetel işleri yuqarı vekili Kaya Kallas Rusiyeniñ beyanatları barışıq muzakerelerini bozmaq içün diqqat celp etecek mahsus areket ola, dep tüşüne. ABD prezidenti Donald Trump da Ukrayina quvetleri Putinniñ rezidentsiyasına darbe endirgenine inanmay, dep ayttı.
Ukrayina Ava küçleriniñ "Zapad" Ava komandanlığı bildirgenine köre, Rusiye arbiyleri yanvarniñ 8-nde aqşam keç saatlarda Lvivge ballistik trayektoriyada saatta 13 biñ kilometr süratınen uçqan raketanen darbe endirdi.
"Yanvarniñ 8-nde saat 23:47-de duşman ballistik raketa qullanıp, Lvivdeki infrastruktura obyektlerina raketa darbesini endirdi… Rusiye istilâcıları şeerge ücüm etken raketa çeşiti bütün elementleri ögrenilgen soñ belli olacaq", – dep aytıla haberde.
Lviv şeer yolbaşçısı Andriy Sadovıy gece şeerde ava telükesi ilân etilgen soñ patlavlar eşitildi, dep bildirdi.
"Bu "Oreşnik" edimi – şimdilik belli degil. Arbiyler malümat berecek. Kritik infrastrukturağa darbe endirildi. Hızmetler çalışa, yanğınnı söndürmege devam eteler", – dep qoştı o.
Lviv vilâyetiniñ arbiy memuriyet yolbaşçısı Maksım Kozıtskıynıñ bildirgenine köre, Lvivde raketa ücümi yerinde laborator tedqiqatlar yapıldı. "Radiatsion fon – norma sıñırlarında. Avada zararlı madde seviyesiniñ artması qayd etilmedi", – dep qayd etti o.
Ukrayina Silâlı quvetleriniñ Ava küçleri gece haber etkenine köre, yanvarniñ 8-nde saat 23:00-lerde bütün Ukrayinada "Kapustin Yar" poligonından Rusiye ballistik raketalarını qullanuv telükesi olğanı içün raketa telükesi ilân etildi, soñra Lviv vilâyetinde patlavlar qayd etildi.
Bir gece devamında Rusiye ordusı Kyiv ve Kyiv vilâyetine de darbe dronları, ballistik ve qanatlı raketalarnen ücüm etti. Kyivde dört kişi elâk oldı, 24 insan yaralandı, ışıq, suv ve qızdıruv problemleri bar, dep haber etile. Yaralanğanlar arasında ekimler ve qurtarıcılar bar. Kyiv vilâyetinde yaralanğan 5 kişi aqqında haber etildi.
"Oreşnik" – Rusiyeniñ orta mesafeli raketa kompleksidir, ekspertlerniñ fikirince, "Yars" qıtalararası raketa esasında yapıldı. Tezleşüv dereceleriniñ eksilgen sayısı sayesinde "Oreşnik" daa kiçik ve qullanuv mesafesi daa az – tahminen 5 biñ kilometr. Rusiyeniñ bu kompleksniñ raketasını 2024 senesi noyabrniñ 21-nde Ukrayina şarqında Dniprodaki "Yujmaş" müessisesine darbe endirgende qullanması mümkün edi. Müessise zarar kördi, şeerde ise insanlar elâk oldı ve yaralandı.