Hususan, Kreml yolbaşçısı dedi ki, Ukrayina talap etkeni kibi, Rusiye ordularınıñ işğal etilgen topraqlardan çekilmesi "asla olmaycaq", ğarbiy memleketlerniñ siyasetçileriniñ Rusiyeniñ "cenk meydanında strategik mağlübiyetke oğratmaq" istegi ise Kremlni "soñuna qadar ketmege" mecbur etecek.
"Ğarp memleketleriniñ siyasetçileri bizim strategik mağlübiyetimizge irişmege istegenlerini aytalar, amma Rusiye içün bu devletçiliginiñ toqtatılması demektir. Soñra sual peyda ola: "Ne içün qorqmaq kerek, soñuna qadar ketmek daa yahşı olmazmı?" — dep yaza Putinniñ sözlerini Meduza.
Rusiye prezidenti, memleketniñ özek doktrinasında ola bilecek deñişmeler aqqında tüşüngenini de bildirdi, anda özek silâsınıñ qullanılması tek duşman tarafından böyle areketlerge cevap olaraq közde tutula. "Amma doktrinada qabaatlav darbesini bizge kerekmey, biz de cevap darbesinde duşmanlarnı yoq etecekmiz", - dep añlattı Putin.
İyünniñ 14-nde Vladimir Putin, Ukrayina Donetsk, Lugansk, Zaporojjâ ve Herson vilâyetlerinden ordusını bütünley çıqarıp, NATO-ğa kirmekni red etken soñ, Moskva ateşni toqtatır ve barışıq muzakerelerini başlamağa azır olğanını bildirdi. Onıñ aytqanına köre, Ğarp Moskvağa qarşı sanktsiyalarnı lâğu etmeli.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.