Ukrayina ava mudafaası Kıyiv vaqtınen saat sekizde olğan malümatqa köre, Rusiye ordusı gece ücüm etken 154 Shahed tipindeki dronnı (58-si reaktiv) zararsızlaştırdı. Uçaqlarnıñ bir qısmı işğal etilgen Qırımdan uçurılğan. 6 ücüm uçağı alâ daa avada, arbiy işler devam ete, dep bildire Ukrayina Silâlı quvetleriniñ ava quvetleri.
Ukrayina arbiyleri 26 yerde duşmannıñ ava ücüm vastalarınıñ urulğanını ve 9 yerde parçalarnıñ tüşmesini qayd etti.
Ukrayina Arbiy-deñiz quvetleriniñ ava quvetleriniñ malümatına köre, Boşnıñ 2-ne keçer gecesi duşman Orel, Kursk, Brânsk, Donetsk, Sarabuz yönelişlerinden "Şahed" tipindeki 193 (olardan 75-i reaktiv), "Gerbera" tipindeki ücüm uçaqlarını, "Parodiya" tipindeki dron-imitatorlarınen ücüm etti.
Odesanıñ yerli akimiyeti bildirgenine köre şeer gece uzun bir teneffüsten soñ kene Rusiye ücümlerine oğrağan, dört insan yaralanğan. İçtimaiy ağlarda patlav sesleri aqqında da yazıla.
Rusiye arbiyleri Ukrayina regionlarına muntazam sürette ücüm ete, çeşit silâ qullana – uçucısız, raketa, KAB, reaktik toplu atış sistemaları.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tasnif ete ve olarnıñ maqsadı bar, dep qayd ete.
İnsanlarnı elektrik energiyası, sıcaq, su, bağ, tibbiy yardım ve yaşayış içün diger kerekli şaraitlersiz qaldırmaq içün eali yaşayışını teminlev sistemaları ve sağlıq müessiselerine qarşı ateşler genotsid areketleriniñ alâmetlerini taşıy.
Rusiye reberligi Rusiye ordusı büyük cenk vaqtında Ukrayinanıñ şeer ve köylerinde vatandaş infrastrukturasına qarşı darbe endirgenini, vatandaşlarnı öldürgenini ve hastahane, mektep, bala bağçaları, energetika ve suv obyektlerini yıqqanını inkâr ete.