Dekabrniñ 3-ne keçken gecesi RF ordusı Ternopilge "Şahed" uçaqlarınen ücüm etti, uçaq elektrik ağınıñ obyektine uruldı, şeerniñ bir qısmında elektrikler yoq oldı, dep bildirdi yerli akimiyet.
"Düşman dronu Ternopil territoriyasında kritik infrastruktura obyektine uruldı. Şeerniñ bir qısmı elektriksiz qaldı", — dep yazdı Ternopil şeer yolbaşçısı Serğiy Nadal telegram-kanalında.
Onıñ aytqanına köre, fevqulâde vaziyetler hızmeti ve energetik hadimleri ücümniñ aqibetlerini yoq etmek içün çalışalar. Aynı zamanda, Nadal yerli sakinlerni suv yedeklerini yapmağa çağırdı, çünki elektrik energiyasınıñ yoqluğı sebebinden suv teminlevi ile bağlı problemler tahmin etile.
"Energetikler ve qurtarıcılar ücümniñ aqibetlerini yoq eteler. Suv yedeklerini yapıñız, telefonlarnı yüklendiriñiz", — dedi şeer başı.
Dekabrniñ 2-ne keçken gecesi Ternopilde "Şahed" beş qatlı mesken binasına tüşti, bir insan elâk oldı, daa üç kişi yaralandı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.