Rusiye arbiyleri martnıñ 19-na keçer gecesi Ukrayinağa 133 darbe uçucısızınen ücüm etti, tahminen 70-i – "Şahed" dronları, dep bildirdi Ukrayina Silâlı quvetleriniñ Ava küçleri. Dronlar Rusiyeniñ beş yönelişinden ve işğal etilgen Qırımnıñ Sarabuz qasabasından uçurıldı.
"İlk malümatqa köre, saat 08:00-ğa qadar ava mudafaası memleketniñ şimali, cenübi, ğarbi ve şarqında Shahed, Gerber, İtalmas ve diger dronlar olğan 109 duşman uçucısızını bastırdı/urdı", – dep aytıla haberde.
Arbiylerniñ malümatına köre, 11 yerde 20 darbe uçucısızınıñ ücümi, yedi yerde parçalarnıñ tüşkeni qayd etildi.
Ava quvetleri ücüm devam ete, Ukrayina avasında bir qaç Rusiye uçucısızı buluna, dep tenbiledi.
Rusiye arbiyleri Ukrayina regionlarına çeşit silâ qullanıp muntazam surette ücüm ete.
Rusiye akimiyeti, Rusiye ordusı Ukrayinanıñ şeer ve köyleriniñ grajdan infrastrukturalarına, hastahaneler, mektepler, bala bağçaları, energetika ve suv teminlevi obyektlerine ücüm etkenini red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıdı ve olarnıñ maqsatlı olğanını qayd ete.