Rusiye ordusı Odesa limanına ücüm etti — bir insan elâk oldı, yaralanğanlar bar, eki vatandaş gemisi zararlandı, dep bildirdi Ukrayina ğayrıdan tiklev meselelerinden baş nazirniñ muavini, Ukrayina cemiyet ve topraqları inkişafı naziri Oleksiy Kuleba.
"Oktâbrniñ 14-nde Rusiye nevbetteki sefer Odesa limanını ateşke tuttı. Ücüm neticesinde bir insan elâk oldı, daa sekiz yaralandı. Er kes vatandaşlar. Bundan da ğayrı, Palau Optima bayrağı altında quru yük ekinci kere zarar kördi. Bir afta evel bu gemi ballistik ateşi neticesinde zarar kördi. O vaqıt ecnebiyler — ekipaj azaları zarar kördi", — dep yazdı o.
Kulebanıñ aytqanına köre, bugün zarar körgen diger gemi — NS Moon — Beliz bayrağı altında yüre.
Nazirniñ qayd etkenine köre, ücüm vaqtında aşlıq anbarı, yük kranları, anbar binaları, tehnika, deñiz limanları memuriyeti filialınıñ binası, maşinalar zarar kördi.
Odesa OVA başı Oleğ Kiper Odesağa ballistik raketa ile ücüm etilgenini qoştı. Onıñ aytqanına köre, yaralanğanlar hastahanede buluna, ekisi ağır alda. Onıñ aytqanına köre, yaralanğanlar hastahanede buluna, ekisi ağır alda. Bütün yaralanğan ve elâk olğanlar — liman infrastruktura hadimleri, Ukrayina vatandaşları.
Kulebanıñ malümatına köre, soñki üç ay içinde Rusiye quvetleri limanlarğa, vatandaş gemilerine ve aşlıq anbarlarına aman-aman 60 kere ücüm etti.
Rusiye ordusı Odesa vilâyetine, şu cümleden liman infrastrukturasına muntazam surette ücüm ete. Rusiye Federatsiyasınıñ reberligi, Rusiye ordusı Ukrayinanıñ şeer ve köyleriniñ grajdan infrastrukturalarına tam miqyaslı cenk vaqtında ücüm etkenini red ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.