İlk yaz ayınıñ 5-ne keçken gecesi Qırım dron ücümine oğradı, dep bildire Rusiye Mudafaa nazirligi ve Qırım telegram kanalları.
Rusiye mudafaa nazirliginiñ malümatına köre, Rusiye ava mudafaası Qırım üzerinde 8 dron, Qara ve Azaq deñizlerinde ise birer pilotsız uçaq yoq etti. Rusiye Mudafaa nazirligi, ne qadar dron qullanılğanını aytmay, cenk şaraitlerinde mustaqil menbalar yardımınen bu malümatnı tasdıqlamaq qıyın.
Qırımdaki ücüm aqqında Qırım telegram kanallarında da yazılğan edi. Hususan, "Krımskiy veter" kanalı, abunecilerine atıf etip, saat 22:43 ve 22:44 Kefede patlavlarğa oşağan bir ses eşitildi, dep bildirdi. Bundan ğayrı, saat 22:50 yaqın eşitilgen patlavlar aqqında haber etilgen edi. Bundan da ğayrı, Kefe saat 23:00-da ve Qırımnıñ Yedi Quyu rayonında saat 3:35-te RF Ava mudafaasınıñ işi aqqında haberler peyda ola edi. Bu malümatnıñ başqa bir tasdıqlavı şimdilik yoq.
Rusiye akimiyeti vaziyetni izaatlamadı. Ukrayina tarafı ücüm aqqında daa haber etmedi.
2022 senesinden başlap yarımadağa er kün ücüm ete, çoqusı allarda Rusiye Mudafaa nazirligi ya da Rusiye akimiyeti arbiy obyektlerge ücüm etilgenini tasdıqlamay.