Rusiye Mudafaa nazirligi Ukraina sıñırından ordunıñ bir qısmını çekti, dep bildirdi. Laf Rusiye Cenübiy arbiy okrugına kirgen birleşmeler aqqında kete.
«Cenübiy arbiy okrugınıñ ordusında bölük, ekipaj arbiy keliştirilüvi ve motoatıcılıq birleşüvleri, arbiy ordular ve mahsus ordularda esaplav etapı yekünlendi. Ast bölük erkânında 10 biñden çoq arbiy umumiy arbiy poligonlardan daimiy bulunuv noqtalarına qaytacaq», – dep aytıla haberde.
Müessise, talimler bir aydan berli Astrahan, Volgograd ve Rostov vilâyetlerinde, Stavropol, Kuban, Kavkaz, ilhaq etilgen Qırımda ve işğal etilgen Gürcistan topraqları – Abhaziya ve Cenübiy Osetiyada devam etti, dep qayd etti.
Soñki aftaları Amerika Birleşken Devletleri, NATO ve Kyivni Ukraina sıñırı yaqınlarında ve Rusiye işğal etken Qırım yarımadasında bulunğan tahminen 100 000 Rusiye arbiyi qasevetlendire,
ABD resmiy şahısları Moskva arbiy ücümni planlaştıra bile, dep bildire. Bu ücüm bir qaç afta içinde kerçekleştirile bile. Kreml bu malümatnı inkâr ete.
Ukraina sıñırına yaqın Rusiye arbiyleriniñ sayısı artqan soñ prezident Vladimir Putin, ABD ve NATO Rusiyege keniş «telükesizlik kefaletlerini» bersin ve alyansnıñ Şarqqa, hususan Ukrainağa kenişlemesine izin bermesin, dep talap etti.
Kreml ve ABD memuriyeti telükesizliknen bağlı eki taraflı muzakereler keçirmege planlaştıra, dep bildirdi, lâkin ne vaqıt ötkerilecegi daa belli degil.