Rusiye Federatsiyası kontrolindeki Qırım Yuqarı mahkemesi Yalta sakinini 18 yılğa azatlıqtan marum etti (RF Ceza kodeksiniñ 275 maddesi). Rusiye quvetçileri onıñ Ukrayina telükesizlik hızmeti ile işbirlik yapqanını iddia ete. Bu aqta Oraqnıñ 3-nde Qırımnıñ Rusiye prokuraturasınıñ matbuat hızmeti bildirdi.
Rusiye tahqiqatınıñ versiyasına köre, erkek "mahsus arbiy operasiyanıñ" (Rusiyede Ukrayinağa qarşı cenkni böyle adlandıralar - QA) keçirilmesine qarşı çıqıp, 2024 senesi yazda SBU vekili ile bağlanğan ve soñra Rusiye quvetçileriniñ şahsiy erkânınıñ bulunğan yerlerini videoğa çıqarmağa başlağan, bundan soñ onı tutıp aldılar.
Adı ve soyadı bildirilmey, açıq izaatlar berilmey. Cenk şaraitlerinde Rusiye tarafınıñ versiyasını teşkermek imkânsızdır.
SBU bu ükümni izaatlamadı.
Rusiyede ve onıñ tarafından işğal etilgen topraqlarda quvetçiler Ukrayina tarafdarlarını taqip eteler. Rusiye tarafdarı olğan qırımlı bloger Aleksandr Talipov öz telegram kanalında Ukrayinağa qoltutqan Qırımlılarnıñ şahsiy malümatlarını derc ete. Böyle şikâyetlerniñ neticesinde qırımlılar RF ordusını "areketsizleştirgenleri" içün yaqalana ve memuriy ve cinaiy mesüliyetke çekile.