Yarımadanıñ Rusiye mahkemesi Qırım sakini İgor Poçigayloğa yerli tükânda ukrayin yırlarını diñlegeni içün 30 biñ ruble para cezasını berdi. Dava yarımadanıñ Rusiye Curçı mahkemesi tarafından baqıldı.
Mahkeme malümatına köre, Rusiye vatandaşı Poçigaylo bu yıl sentâbr ayında Büyük Onlar köyünde “Kormilets” tükânında ukrayin yırlarını diñlep, “mahsus arbiy operatsiyanıñ” (Rusiye akimiyeti Ukrayinağa qarşı agressiv cenkni böyle adlandıra – QA) keçirilüvinen bağlı işançnı bozğan.
Qayd etilgenine köre, erkek qabaatını tolusınen tanıdı, protokolda aytılğanlarğa itiraz bildirmedi, peşman oldı ve afu soradı. Poçigaylo diñlegen yırlar belli degil.
Mahkeme onı Rusiye Federatsiyası Memuriy uquq bozuvları kodeksiniñ 20.3.3 maddesiniñ 1-inci qısmına (Rusiye Federatsiyası Silâlı quvtelerini itibardan tüşürgen areketler) istinaden memuriy uquq bozuvında qabaatlı tanımağa qarar çıqardı ve oña 30 biñ ruble para cezası şeklinde memuriy ceza berdi.