Krasnodar ülkesi mahkemesi devlet hainliginde qabaatlı tanılğan Qırım sakinine qarşı cinaiy davanıñ baqılmasını bitirdi. Bunı bugün, Orta küzniñ 30-nda "Qırım esnası" aq qorçalayıcı teşebbüsi bildire.
Aq qorçalayıcılarnıñ bildirgenine köre, Rusiye mahkemesi Qırımlını 12 yıl ve 6 ay umumiy rejimli tüzetüv koloniyasında qalmasına üküm etti, azatlığı bir buçuq yılğa sıñırlandı ve 150 biñ ruble para cezasını aldı.
Mahküm etilgenniñ malümatı gizli, lâkin, mevcut malümatqa köre, 2025 senesi Orta küzniñ 31-nde Soçi şeeriniñ ava limanında hırsızlanğan ve tahminen dört ay devamında qabaatlanmayıp ve tibbiy yardım kösterilmeden Rusiye Federatsiyasınıñ Voronej vilâyetiniñ Borisoglebsk şeeriniñ SİZO-sında ve diger yerlerde tutulğan Qırımtatar Diana Gavrilük (Abduraşitova) aqqında söz kete, dep bildire "Qırım esnası". Bu sene Sabanda Rusiye quvetçileri onı devlet hainliginde qabaatladı ve Krasnodar tahqiqat izolâtorına avuştırdı.
"Qırım esnası" yazğanına köre, Krasnodar ülkesi mahkemesiniñ resmiy saytında ve bu kibi taqipler aqqında malümat tarqatqan diger ananeviy menbalarda Diana Gavrilükke qarşı qabaatlavnıñ tafsilâtları aqqında malümat yoq.
Aq qorçalayıcı teşebbüsiniñ bildirgenine köre, Rusiye mahkemesiniñ resmiy saytında qabaatlanğannıñ ve dava taraflarınıñ şahsiy malümatları gizlengen. Yedi mahkeme oturışuvı ve ükümniñ ilân etilüvi qapalı şekilde keçti. Üküm çıqarılğan yer ve vaqıt Krasnodar ülkesi mahkemesiniñ saytında ilân etilgeninden dört saat keçken soñ derc etildi.