Rusiye tarafından teşkil etilgen Qırım Yuqarı mahkemesi Rusiye kontrolindeki Aqmescit Kiyev rayon mahkemesiniñ qırımtatar faalleri Memet Lümanov ve Rustem Osmanovnıñ SİZO-da apis müddetini 2024 senesi noyabrniñ 4-ne qadar uzatmaq qararını quvette qaldırdı. Bu aqta "Qırım birdemligi" haber ete.
Mahkeme oturışı qapalı şekilde keçti, siyasiy mabüsler Aqmescit SİZO-sından video konferentsiya bağı vastasınen diñlevde iştirak etti.
İmaye, Rusiye mahkemesiniñ qararını esassız dep saya, çünki onıñ fikrince, o tahqiqatçınıñ tahminlerine esaslandı.
"Taqiqatçı öz muracaatında balalar qaçıp ketkenini, tahqiqatqa tesir etkenini, şaatlarnı qorqutqanını ve delillerni yoq etkenini tahmin ete. O, bu tahmin ve qorqularını tasdıqlamay ve tasdıqlamadı. Er şey, aytqanları kibi, adiy keçti. Mahkeme bir de bir bozuv körmedi ve Kiyev rayon mahkemesiniñ qararını amelde qaldırdı", — dep izaatladı imayeci Emil Kurbedinov.
2024 senesi martnıñ 5-nde Qırımda qırımtatarlarnıñ evlerinde kütleviy tintüvler keçti. Bağçasarayda tahqiqat tedbirleri "Qırım birdemliginiñ" faallerinde, Canköy rayonında ise diniy erbaplarda keçirildi. Umumen 10 qırımtatarınıñ evinde tintüvler keçirildi.
Rusiye quvetçileri martnıñ 5-nde tutulğan qırımtatarlarnı terroristik teşkilâtta iştirak etüvde qabaatladı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.