Rusiye tahqiqatınıñ versiyasına köre, 2016 senesi Zekeryayeva "VKontakte" içtimaiy ağında Ukrayina vatandaşı Madina Strâpçaynen qonuşa edi, soñra o Suriyege ketti, anda "Rusiye Federatsiyasınıñ menfaatlarına zıt kelgen" maqsatları olğan silâlı taqımğa qoşulğan ve terror eylemini yapmaqnı planlaştırğan. Qırımtatar 2023 senesi avgust ayında evinde keçirilgen tintüv vaqtında taqiqatçılarğa Strâpçay aqqında malümat bermedi ve bu malümatnı gizledi, dep qabaatlandı.
"FSB elde etken yedi yıl evelsi olğan VKontakte yazışmalarından bir kimse cinayet azırlağanı ya da yapqanı körünmey. Müvekkilimni qabaatlamaq içün iç bir uquqiy sebep yoq edi", — dedi advokat Emil Kurbedinov.
Emine Zekeryayeva özüni qabaatlı saymağanını qayd etti. Advokatınen beraber mahkeme qararına itiraz arizasını bermege niyetlene.
Avgustnıñ 7-nde Eski Qırımda 30 yaşındaki qırımtatar Asan Zekeryayevniñ evinde tintüv olıp keçken edi. Bundan soñ erkekni bellisiz yerge alıp ketken ediler. Biraz soñra olarnıñ evinde daa bir tintüv keçirilgeni belli olğan edi. Tintüvden soñ yaqalanğan Asan Zekeryayevni ve apayı Emine Zekeryayevanı Aqyamecitke alıp ketken ediler.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.