Rusiyeniñ Cenübiy okrugınıñ arbiy mahkemesi saban ayınıñ 17-nde Bağçasaraydaki "Qırım musulmanları davası" mabüsleriniñ apis müddetini uzattırdı. Memet Lümanov, Rustem Osmanov, Mustafa Abduramanov ve Aziz Azizov bu sene oraq ayınıñ 7-ne qadar SİZO-da qalacaq. Bu aqta "Qırım birdemligi" cemaat birleşmesine advokat Emil Kurbedinov bildirdi.
Onıñ qayd etkenine köre, imayeniñ delillerine baqmadan, mahkeme prokurornıñ davanıñ iştirakçilerine qarşı tedbirlerniñ uzattırılması aqqında muracaatını qanaatlendirdi.
"Biz davanıñ tamamınen taraflı olğanını bildirdik. Müvekkilim Aziz Azizov tahqiqat izolâtorında qabaatını tanımağanı içün buluna, prokuror aytqan sebeplerden degil", — dedi Kurbedinov.
Bundan ğayrı, oturışuvda Mustafa Abduramanovnıñ evinde keçirilgen tintüvde iştirak etken şahıs sorğuğa çekildi. Kürbedinovnıñ aytqanına köre, tintüv vaqtında şaat uquq fakultetiniñ studenti edi. Şimdi o, Qırım mahkemelerinden biriniñ hadimi ola.
Azizovnıñ imayecisiniñ qayd etkenine köre, şaat qabaatlav tarafınıñ suallerine tafsilâtlıca cevap berip, tintüv tafsilâtlarını añlattı. Amma advokatlar sorğuğa başlağanda, cevapları "Men hatırlamayım" ibaresine deñişti.
2024 senesi saban ayınıñ 5-nde saba Qırımda Qırımtatarlarnıñ evlerinde kütleviy tintüvler keçti. Bağçasarayda taqiqat tedbirleri "Qırım birdemligi"niñ faallerinde, Canköy rayonında ise diniy erbaplarda keçirildi. Umumen 10 Qırımtatarınıñ evinde tintüvler keçirildi.
Tintüvlerden soñ FSB eñ azından beş insannı tuttı, olarnıñ arasında sabıq imam Remzi Kurtnezirov bar edi.
Rusiye quvetçileri saban ayınıñ 5-nde tutulğan Qırımtatarlarnı terroristik teşkilâtta iştirak etüvde qabaatladı.