Aqmescitte Rusiye kontroli altında olğan Kiyev rayon mahkemesi "Qırım" gazetiniñ vekilleriniñ şikâyet arizasını qanaatlendirmedi ve Rusiye ordusını itibardan tüşürgenleri içün 300 biñ rublelik para cezasını belgiledi. Bu aqta "Qırım birdemligi" advokat Lilâ Gemeciniñ malümatına atıf etip bildire.
Protokol içün sebep gazetanıñ saytında derc etilgen haber oldı. Umumen altı memuriy protokol tizildi: eki - neşirniñ özüne, eki - gazetniñ tesisçisi ve müdiri Seyran İbragimovğa, eki — baş muarriri Bekir Mamutovğa.
Söz qırımtatar halqı Qurultayınıñ azası Ali Özenbaşnıñ ne içün qırımlılar Ukrayinağa qarşı cenkte iştirak etmemek kerekligi aqqında yazısı aqqında kete.
Gemiciniñ qayd etkenine köre, memuriy protokol mahkemecilikke köre baqılmadı. Davanı Aqmescitniñ Kiyev rayon mahkemesine degil de, Aqmescit rayon mahkemesine bermek kerek ediler.
Bundan da ğayrı, protokol tizilgen soñ, oña deñişmeler kirsetilgen, bunıñ içün memuriy dava nizamı bozulğan.
İmaye, Ali Özenbaşnıñ maqalesiniñ tercimesi yañlış olğanını da qayd etti. İmaye tarafı şikâyet arizasına qırımtatar sözleriniñ online sözlüklerden tercimesini ilâve etti, bu ise "pek sıñırlı", dep qayd ete uquqçı. Tercimanğa, bilerek yañlış tercime içün mesüliyet aqqında haber etilmedi.
Gemeci, davalardaki tercime qanun talaplarına uymay, ve cinayet terkibi olmağanı içün toqtatılmalı, dep qoştı. Advokat, şikâyet arizasını bermege niyetlengenini bildirdi.
"Milliy kütleviy haber vastası içün bu pek büyük paradır. Şunıñ içün tek gazet abunecileri degil de, halqımıznıñ bütün temsilcileri bu para cezasını ödemege yardım etmek içün birleşmeli", — dep ayttı o.
"Qırım" gazeti qırımtatar tilinde 1989 senesi iyül ayından berli çıqa ve qırımtatarlar Qırımğa qaytqan soñ bu tilde çıqqan ilk neşirlerden biridir.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.