Rostov-na-Donudaki Rusiyeniñ Cenübiy okrugınıñ arbiy mahkemesi Bağçasaray rayonınıñ sakinini internette ekstremist ve terrorist faaliyetine çağırğanında qabaatlap, üç yıl tüzetüv koloniyasında qalmasına üküm etti. Bu aqta Rusiye kütleviy haber vastaları Qırımdaki Rusiye FSB idaresiniñ malümatına esaslanıp yaza.
«Bağçasaray rayonınıñ sakini 2004 senesi doğma Apkelâmov Adil Narimanoviçke mahkeme ükmü çıqarıldı, <…> İnternet ağında ekstremist ve terrorist faaliyetine açıq çağıruvlar içün. Mabüs Telegram messencerindeki akkauntını qullanıp, millet mensüpligine köre şahıslarğa – ruslarğa – qarşı zorbalıq areketlerine çağıruv metinlerini derc etken edi. Mabüs umumiy rejim tüzetüv koloniyasında üç yıl qalmasına üküm etildi», – dep aytıla haberde.
Dava Rusiye Federatsiyası Ceza kodeksiniñ 205.2 maddesiniñ 2-nci qısmı ve 280 maddesine istinaden açıldı. Erkekniñ üç yıl müddetinen saytlarnıñ baqıluvı ve İnternet ağınen beraber informatsion-telekommunikatsion ağlarnıñ qullanıluvınen bağlı faaliyetnen oğraşuv aqqı sıñırlanğan edi.
«KrımSOS» aq qorçalayıcı teşkilâtınıñ malümatına köre, 2024 senesi eñ az 56 qırımlı Rusiye akimiyeti tarafından taqip etildi. Cinaiy davalarnıñ sebebi Rusiyede yasaqlanğan teşkilâtlarnen bağlar, devlet hainligi, casuslıq, açıq fikir bildirüvleri, diversiyalar ya da zorbalıq çağıruvlarında qabaatlavlar olğan.
Aq qorçalayıcılar Rusiye uquq qoruyıcıları açqan devlet hainligi, işbirligi ve casuslıq davaları bir qaç qat artacaqtır, dep tahmin ete. Şimdi FSB aman-aman er kün böyle davalar aça, 2014 senesine qadar olarnıñ sayısı yılda eñ çoq 10 edi. Ukrayinağa qarşı büyük istilâdan soñ devlet hainligi maddesi Rusiyede cenkke qarşı çıqqanlarğa qarşı qullanılğan maddelerden eñ populârı oldı.