Rusiye kontrolindeki Aqmescitniñ Kiyev rayon mahkemesi qırımlı aq qorçalayıcı Abdureşit Cepparovğa Rusiye ordusını itibardan tüşürgeninde qabaatlap, 45 biñ ruble para cezasını berdi. Bu aqta «Qırım esnası» aq qorçalayıcı teşebbüsi bildirdi.
«Aqmescitniñ Kiyev rayon mahkemesiniñ qadısı Oksana Karçevskaya «Qırım ğayesi» informatsion teşebbüsiniñ saifesinde paylaşuv yapqanından Rusiye ordusını itibardan tüşürgeninde qabaatlanğan qırımlı aq qorçalayıcı Abdureşit Cepparovğa qarşı memuriy davanı baqtı. Mahkeme memuriy protokol tizgen şahısnı sorğuğa çekti, soñra ise aq qorçalayıcını qabaatlı dep tanıdı», – dep aytıla haberde.
Rusiye uquq qoruyıcıları qırımlı aq qorçalayıcı Abdureşit Cepparovğa qarşı «Rusiye ordusını itibardan tüşürüv» ve «serbest malümatnı suistimal etüv» maddelerine istinaden eki yañı memuriy dava açtı.
ZMINA aq qorçalayıcı teşkilâtı bildirgenine köre, Abdureşit Cepparovnı «Qırım ğayesi» teşebbüsiniñ saifesini idare etkeninde» qabaatlay ekenler. Saife yarımadada halqara uquq bozulğanına dair haber ve insan aqları bozulğanına dair malümatlar derc ete».
Cepparovnıñ aytqanına köre, o, bu qabaatlavlarnen razı degil. Onıñ bildirgenine köre, «Qırım ğayesiniñ» quruluvına alâqası olsa da, al-azırda bu aq qorçalayıcı leyhanen oğraşmay.
Rusiye uquq qoruyıcıları Abdureşit Cepparovnı aprelniñ 25-nde saba evinde tintüv keçirgen soñ tuttı. Evinde ömür arqadaşı ve 14 yaşında qızı bar edi. Cep telefonları alındı ve advokatnı çağırmağa izin bermedilr,
Rusiye kontrolindeki Qırımnıñ Qarasuvbazar rayon mahkemesi onı «poliske riayet etmegeni» içün (Rusiye Memuriy uquq bozuvları kodeksiniñ 19.3 maddesi) 12 künge apiske aldı.
Abdureşit Cepparov ilk sefer tutulmay. Bıltır mart ayında da evi tintilgen edi. Bundan soñ Rusiye kontrolindeki Qarasuvbazar rayon mahkemesi aq qorçalayıcı ve qırımtatar milliy areketiniñ veteranını apiske alğan edi. O vaqıt Cepparov içtimaiy ağlarda «natsist atributikasınıñ ve timsalleriniñ propagandası» qabaatı ile 15 künge apiske alınğan edi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.