Rusiye mahkemesi işğal etilgen Berdânsklı nefaqacını Ukrayina Silâlı quvetlerine maliyeviy destek köstergeni içün 14 yıl apis cezasına mahküm etti. Qayd etilgenine köre, 1952 senesi doğğan qadın Ukrayina arbiy hızmetiniñ esabına 1500 ğrıvnâ (33,63 dollar ya da Rusiye Merkeziy bankınıñ kursı boyunca 3 383 ruble) yollağan.
Tahqiqatnıñ versiyasına köre, "SVO başlanğan soñ" nefaqacıda "Rusiye devlet akimiyet organlarınıñ vekillerine nisbeten menfiy munasebeti şekillengen". 2024 senesi o, Ukrayin arbiylerine Ukrayin bankınıñ mobil qullanımı vastasınen 1500 ğrıvnâ yollağan. Bu, quvetçilerniñ fikirince, Rusiye telükesizligine zarar ketirgen.
Rusiye Federatsiyası tarafından teşkil etilgen Zaporijjâ vilâyet mahkemesiniñ beyanatında aytıla ki, qadın 2023 senesi Rusiye vatandaşlığını alğan. Nefaqacı qadınnı "devlet hainligi" maddesine istinaden mahküm ettiler.
"Nastoyaşçeye Vremâ" yazğanına köre, Rusiyeniñ Ukrayinağa istilâsı başlanğan soñ, devlet hainligi ve casuslıq aqqında maddeler siyasiy taqipniñ eñ tarqalğan şekillerinden biri oldı. "Birinci bölük" esaplağanına köre, 2026 senesiniñ birinci kvartalında mahkemelerge devlet hainligi aqqında kelgen cinaiy davalarnıñ sayısı Rusiyede 2025 senesiniñ köstergiçlerinden 20% ziyade oldı.