Rusiyeniñ umumiy yurisdiktsiyasındaki Üçünci istinaf mahkemesi Rusiye tarafından teşkil etilgen Qırım Yuqarı mahkemesiniñ Rusiye quvetçileri tarafından hırsızlanğan Herson sakinlerini casuslıqta qabaatlap, 15 ve 16 yılğa apis cezasına mahküm etken qararına qarşı şikâyetni red etti. Bu aqta "Qırım esnası" haber ete.
Şikâyet qapalı şekilde baqıldı. Mahküm etilgenlerniñ soyadları mahkemeniñ saytında yoq. Amma, ''Qırım esnası'' yazğanına köre, elde olğan malümatnıñ talili, Qırımdan kelgen rusiyeli mahkemeci Viktor Sklyarov 2023 senesi sentâbrniñ 27-nde bu dava boyunca üküm çıqardı. O künü Rusiye kontrolindeki Qırım Yuqarı mahkemesiniñ matbuat hızmeti böyle haber tarqatqan edi:
''Ukrayina vatandaşı S. Kotov ve N. Petrovskiy casuslıqta qabaatlı tanıldı. Mahküm etilgen N. Petrovskiyge 16 yıl sert rejimli tüzetüv koloniyasında apis cezası berildi. Kotov 15 yıl sert rejimli tüzetüv koloniyasında ceza alacaq''.O künü Rusiye mahkemesi casuslıq aqqında eki mabüsniñ iştiragi ile diger davalarnı baqmadı.
Göñülli Nikolay Petrovskiy 2022 senesi martnıñ 27-nde Herson merkezinde hırsızlandı. Ğayıp olmasından evel faal körüşüvge ketti ve qaytmadı. Daa soñra belli olğanı kibi, Petrovskiy Rusiye arbiyleri tarafından tutulğan edi. Onı yarım yıl devamında FSB hadimleri tuttı, Rusiye ordusı çekilgende ise şeerden çıqarıldı. Ukrayinanıñ diger vatandaşı Sergey Kotovnı Rusiye arbiyleri evinden 2022 senesi aprel ayında alıp kettiler, onı Herson şeerinde işkencege oğrattılar, ve atıp öldürmek telükesi bar edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.