Rusiye kontrolindeki Aqyarnıñ Lenino rayon mahkemesi, internette izaat bergeninden sebep, yerli sakinni Rusiye Ceza kodeksiniñ 207.3 maddesiniñ 2-nci qısmınıñ "d" maddesine istinaden (Rusiye Silâlı quvetleriniñ qullanılması aqqında açıqtan-açıq yalan malümat tarqatmaq) beş buçuq yıl umumiy rejimli tüzetüv koloniyasında qalmasına üküm etti. Bu aqta Rusiye tarafından teşkil etilgen Aqyar prokuraturası bildire.
"2024 senesi oraq ayında "Telegram" internet-mesenjerinde qadın Rusiye Federatsiyasınıñ Silâlı quvetleriniñ qullanuvı aqqında malümatnı eki kere yalan haber olaraq tarqattı, bu ise Rusiye Federatsiyasınıñ Silâlı quvetlerini itibardan tüşürdi", — dep aytıla haberde.
Tam olaraq qadın ne yazdı, belli degil. Onıñ adı ve soyadı aydınlatılmay, onıñ bu davası boyunca açıq izaatları da yoq. Aqyar sakini qorçalavınıñ mevamı da belli degil.
"Suspilne Krım" açıq menbalardan alınğan malümatqa esaslanıp yazğanına köre, söz, büyük ihtimal ile, Yekaterina Fomenko aqqında kete. "Memorial" aq qorçalayıcı merkezi, o, oraq 7-nde işğal etilgen Aqyarda "Rusiye ordusınıñ areketleri aqqında yañlış malümat tarqatqanı içün" apiske alındı ve Aqmescitniñ 1-nci SİZO-na yollanıldı, dep bildire edi.
Qayd etilgenine köre, bu Fomenkonıñ birinci taqip etilüvi degil, evelleri Rusiye Federatsiyası kontrolindeki Aqyarnıñ Lenin rayon mahkemesi oña internette yazğanları içün eki kere para cezasını bergen edi. Basqı sebebinden o işten çıqmağa mecbur oldı.
2025 senesi iyünniñ 26-nda aynı mahkeme oña VKontakte içtimaiy ağında yazğanı içün 12 biñ ruble para cezasını berdi, anda Rusiye ekspertleri "mongol ırqınıñ vekillerini ve Qıtay sakinlerini aşağılağan" ifadelerni taptı.