Rusiye mahkemesi Aqyar sakinini "devlet hainligi" ile qabaatlap, 21 yılğa azatlıqtan marum etti, dep bildire Rusiye kütleviy haber vastaları Rusiye FSB-siniñ Qırım ve Aqyar idaresiniñ matbuat hızmetine atıf etip.
Berilgen malümatqa köre, 2022 senesi yaqalanğan 48 yaşındaki Aqyar sakini Ukrayina telükesizlik hızmeti ile işbirlik yapıp, , oña Rusiye Federatsiyasınıñ arbiy obyektleri ve yerleşüv yerleri aqqında malümat bere edi. Bundan da ğayrı, Rusiye quvetçileri, mahküm etilgen kişi Aqyarnıñ memuriy binalarından biriniñ yaqılmasını planlaştırğan, dep iddia ete.
Mahküm etilgenniñ adı ve soyadı bildirilmey, onıñ açıq izaatları da yoq. Rusiye quvetçileriniñ aytqanlarını mustaqil menbalar yardımınen teşkermek imkânsız.
Qırımda ve Aqyarda 2014 senesinden başlap eñ azından 20 Ukrayina vatandaşı "casuslıq" ve "diversiya"da qabaatlanıp mahküm etildi. Ukrayinağa tam miqyaslı istilâdan soñ Rusiyede ve işğal etilgen topraqlarda cenkke qarşı çıqqanlar kütleviy surette taqip etile.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.