Qırımda Rusiye mahkemesi Rusiye uquq qoruyıcıları «millet mensüpligine köre bir gruppa insanğa qarşı zorbalıq areketlerini yapmağa çağırğanında» qabaatlağan Aqmescit sakinini bir yıl koloniyada qalmasına üküm etti. Bu aqta Rusiye qurğan Qırım prokuraturası haber etti.
Berilgen malümatqa köre, 37 yaşında erkek içtimaiy ağlarda bunıñnen bağlı malümatlar paylaştı. Ne ve qayda yazğanını Rusiye uquq qoruyıcıları aydınlatmay. Bir yıl koloniyada qalmaqnen beraber bir buçuq yıl devamında saytlarnı baqması yasaqlandı.
Adamnıñ adı ve soyadı aytılmay, açıq izaatları yoq.
Ukrayina prezidentiniñ Qırım Muhtar Cumhuriyetindeki temsilciligi Roskomnadzor Qırım da olğan Ukrayinanıñ Rusiye tarafından işğal etilgen topraqlarındda kontrolni quvetleştire, dep haber etti.
Berilgen malümatqa köre, Rusiye müessisesiniñ emrinen internet provayderleri internet ağına bağlanğan bütün cihazlarnıñ IP adreslerini, geolokatsion malümatını, ağğa irişmek içün qullanılğan bütün cihazlarnıñ identifikatorları, qullanılğan programmalar ve internet trafiki aqqında malümatnı toplap Roskomnadzorğa bermeli.
Rusiyede ve onıñ tarafından işğal etilgen topraqlarda quvetçiler Ukrayina tarafdarlarını taqip eteler. Rusiye tarafdarı qırımlı bloger Aleksandr Talipov öz telegram kanalında Ukrayinağa qoltutqan qırımlılarnıñ şahsiy malümatlarını derc ete. Böyle şikâyetlerniñ neticesinde qırımlılar RF ordusını «areketsizleştirgenleri» içün yaqalana ve memuriy ve cinaiy mesüliyetke çekile.