Vladimirniñ Frunze rayon mahkemesi qırımlı Amet Suleymanovnıñ apis müddetine uymağan eki hastalığına baqmadan, onı azat etmekni red etti. Bu aqta "Qırım birdemligi"ne onıñ imayecisi Lilâ Gemeci bildirdi.
"Bizim delilimiz, müvekkilimniñ Vladimirdeki 2-nci apishanesine avuştırılğanından soñ, FSİN tarafından qanunsız şekilde yapılğan tibbiy hulâsa, zıddiyet doğurdı. Tedqiqat qısmınıñ malümatları, meselâ, kardiolog kibi ince mütehassıslarnıñ neticeleri, bu ekspertizanı imzalağan ekimlerniñ umumiy neticelerine zıt kele", — dedi Gemeci.
Onıñ qayd etkenine köre, hastalıqlarnıñ halqara tasnifi kodları, mahsus olğan ekimler tarafından yazılğan, apiste tutulğan insanğa kelişmegen hastalıqlarnen bütünley bir oldı.
"Amet Suleymanovnıñ diagnozları ve teşkerüvleri ile bağlı diger tibbiy hulâsalarnı mustaqil ekspert teşkilâtına yolladıq. O, qorçalav tarafınıñ, Suleymanovnıñ hastalıqları bar, dep aytqanlarını tasdıqladı. Amma mahkeme bunı körmemezlikke urdı", — dep qoştı advokat.
Lilâ Gemeci şunı da qayd etti ki, mahkeme birinci instantsiya mahkeme esnasında tibbiy hulâsa çıqarğan ekimlerniñ sorğusında ve mustaqil ekspertizanı yapqan mahkeme ekspertiniñ sorğusında imayeni red etti.
İmaye, Frunze mahkemesiniñ qararına qarşı kassatsiya şikâyetini bermege ve FSİNniñ qanunsız tibbiy qararına qarşı memuriy dava açmaqnı planlaştıra.
Adliyeciniñ aytqanına köre, Ametniñ alı apiske alınğanından berli "büyük derecede fenalaştı". Hususan, onda yañı bir hastalıq peyda oldı - köz ağınıñ hipertonik angiopatiyası.
2021 senesi Rusiye mahkemesi Amet Suleymanovnı «Hizb ut-Tahrir davası» boyunca 12 yılğa üküm etti.
Suleymanov sağlıq vaziyeti sebebinden üç yıl ev apsinde edi. Jurnalistniñ arterial ve mitral yürek yetersizligi bar, yürek klapanı deñiştirilmeli.
2023 senesi aprelniñ 6-nda Amet Suleymanov apiske alınıp, izolâtorğa qapatıldı. Advokat Emil Kurbedinovnıñ malümatına köre, Suleymanovnıñ baş ve yürek ağrıları ola.
2024 senesi mart ayında Vladimirdeki Frunze rayon mahkemesi Amet Suleymanovnı apishaneden azat etmedi. Onıñ hastalıqları ise apiste tutulmasına mania ola. Suleymanov uquqçılarnen beraber mahkeme qararına istinaf şikâyetini berdi.
«Memorial» aq qorçalayıcı merkezi Amet Suleymanovnı siyasiy mabüs dep tanıdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.