Rusiyeniñ Ukrayinağa qarşı büyük istilâsı başlağanından işğal etilgen Qırımda Rusiye mahkemelerine «Rusiye Federatsiyasınıñ ordusını itibardan tüşürüv» memuriy maddesine istinaden 943 malümat keldi. Bu aqta Ukrayina prezidentiniñ Qırım Muhtar Cumhuriyetindeki daimiy temsilciliginiñ Qırım yarımadasındaki vaziyetke dair aftalıq esabatında aytıla.
Qayd etilgenine köre, Rusiye mahkemeleri 836 vaziyette bu davanıñ iştirakçilerine para cezalarını berdi.
«Avgustnıñ 19-na qadar vaqtınca işğal etilgen Qırımnıñ sahte mahkemelerine Rusiye Federatsiyası Memuriy uquq bozuvları kodeksiniñ 20.3.3 maddesine istinaden 943 malümatnıñ kelgeni qayd etildi. 836-sında para cezası berildi ya da başqa maddege qoşulıp, umumiy bir qarar çıqarıldı. 18-iniñ malümatı baqıla», – dep aytıla esabatta.
Rusiyede ve onıñ tarafından işğal etilgen topraqlarda quvetçiler Ukrayına tarafdarlarını taqip ete. Rusiye tarafdarı qırımlı bloger Aleksandr Talipov öz telegram kanalında Ukrayınağa qoltutqan qırımlılarnıñ şahsiy malümatlarını derc ete. Böyle şikâyetlerniñ neticesinde qırımlılar tutula ve Rusiye ordusınıñ «areketini yaramaylaştırğanı» içün memuriy ve cinaiy mesüliyetke çekile.
Rusiye Federatsiyası büyük istilâğa başlağan soñ Rusiye ordusınıñ «diskreditatsiyası» aqqında Memuriy cinayetler kodeksiniñ 20.3.3 maddesi kirsetildi. Rusiye-Ukrayına cenki aqqında malümat tarqatqanlar ve Kremlniñ noqta-i nazarına zıt kelgen er angi fikir bildirgenler taqip etile. Rusiye öz qanunlarını yarımada territoriyasına kenişlete, şunıñ içün qırımlılar da bu madde boyunca mesüliyetke çekilmek telükesi altında buluna.
Ukrayına prezidentiniñ Qırım Muhtar Cumhuriyetindeki daimiy temsilcisi Tamila Taşeva haber etkenine köre, 2023 senesi Rusiye Federatsiyasında ve Ukrayınanıñ işğal etilgen topraqlarında ordunı itibardan tüşürgen er altıncı ceza Qırımda qayd etildi. Açıq davalarnıñ sayısı ise 70,6% arttı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.