Rusiye mahkemeleri Rusiye ordusını «itibardan tüşürüv» içün 20 milliondan çoq ruble para cezasını berdi – Ukrayına prezidentiniñ Qırım temsilciligi

Qırımdaki Rusiye mahkemeleri yerli sakinlerni Rusiye Silâlı quvetlerini «itibardan tüşürgenleri» içün 20-den çoq million ruble para cezalarını berdi, dep haber ete Ukrayına prezidentiniñ Qırım Muhtar Cumhuriyetindeki temsilciligi.

Martnıñ 25-ne qadar Qırımdaki Rusiye mahkemeleri Rusiye Federatsiyası Silâlı quvetlerini «itibardan tüşürüv» maddesine istinaden para cezalarını berüv 641 qararnı çıqardı.

«Para cezalarınıñ umumiy miqdarı eñ az 20,3 mln Rusiye rublesi ola. Umumen 622 insanğa qarşı memuriy tedbir alındı. Ermeni Bazarda davalarnıñ sayısı arta, umumen Qırımdaki yañı davalarnıñ 38-inden 23-ü (60%) keldi, 5 ayda ise (2023 senesi noyabr ayından – 2024 senesi mart ayına qadar) Ermeni Bazarnıñ «mahkemesine» 64 dava keldi», – dep haber ete temsilcilik.

Martnıñ başında «KrımSOS» teşkilâtı bildirgenine köre, Rusiyeniñ Ukrayınağa qarşı büyük istilâsı başlağanından Qırımdaki Rusiye mahkemeleri Rusiye ordusını «itibardan tüşürüv» şübhesinen 612 qarar çıqardı.

Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.