Qara qış ayınıñ 5-ne keçken gecesi Rusiye arbiyleri Kıyiv ve Kıyiv vilâyetine kene ücüm etti, neticede elâk olğanlar, yaralanğanlar ve viraneler bar.
Fevqulâde vaziyetler boyunca devlet hızmetiniñ malümatına köre, Kıyivniñ Obolon rayonında dört qatlı tibbiy müessiseniñ binasınıñ ekinci qatında statsionar bölügine darbe endirilgen.
"Yanğın söndürildi. Evni teşkergende insan cesedi tapıldı. 25 insan tahliye etildi, üç kişi yaralandı", — denile beyanatta.
"Obolon rayonındaki şahsiy hastahaneniñ 26 hastasından 16-sı paytahtnıñ kommunal hastahanelerine avuştırıldı", — dep yazdı Kliçko.
"Fastiv rayonında duşman ücümi neticesinde 1951 senesi doğğan aqay elâk oldı. Onıñ cesedi öz evinde yanğın söndürgende tapıldı", — dep yazdı Kalaşnık telegrammada.
Onıñ aytqanına köre, Fastov rayonında yedi şahsiy ve bir çoq qatlı mesken ev, garaj, eki avtomobil, istisal ve anbar binaları zarar kördi.
Bundan da ğayrı, Rusiye Federatsiyasınıñ ücüminden sebep, Slavutıç şeeriniñ elektrigi kesildi. "Bütün kritik infrastruktura obyektleri yedek energiyasına keçirildi. Suv ve qızdıruv şeerde bar", — dep qayd etti OVA yolbaşçısı.
Rusiye arbiyleri çeşit silâ qullanıp, muntazam sürette Ukrayina regionlarına ücüm ete.
Rusiye akimiyeti, Rusiye ordusı Ukrayinanıñ şeer ve köyleriniñ grajdan infrastruktursına maqsatlı darbelerini endirgenini red ete, sakinlerni öldürgenini ve hastahaneler, mektepler, bala bağçaları, energetika ve suv teminlevi obyektlerini yoq etkenini ayta.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıdı ve olarnıñ maqsatlı olğanını qayd ete.