Britaniya Mudafaa nazirligi Keriç (Qırım) köprü rayonında deñiz dronlarından batqan gemi fotoresimlerini talil ete.
«Rusiye Qırım köprü ve boğazdan keçüv paromlarına bağlı. Rusiye tuman generatorları ve suvaltı baryerler kibi passiv imaye vastalarını ve ava mudafaa sisteması kibi faal imaye vastalarını qullana. Köpürniñ logistika içün müimligi, Rusiye işğali timsalleri içün büyük imaye tedbirleriniñ qabul etilüvini talap ete», – dep yaza müessise istihbarat malümatına esaslanıp.
Britaniya tarafı hatırlatqanına köre, Keriç köprüni qorumaq içün Rusiye qarşı tedbirler ala – 2022 senesi sentâbr ayında Rusiye Arbiy-Deñiz quvetleri bir qaç kün devamında barjalarda radiolokatsion tuzaqlarnı sınap baqtı, 2023 senesi mayıs ayında – tuman generatorlarını.
Avgustnıñ 30-nda Azatlıq Radiosı Planet.com servisiniñ uydu çekimlerini elden etti. Köpürden sağda barjalar qoyuldı: batırılmadı, bir yerde lengerlernen bağlandı. Bu barjalar Ukrayına deñiz dronlarına qarşı qora temeli ola.
Ukrayına istihbaratı rusiyeliler Keriç köprüni qorumaq içün paromlarnı batıra, dep bildirdi. Baş istihbarat idaresi Rusiye ordusı köpür ögünde imaye çizgisini yapmaq içün eñ az altı yuzuv vastasını batırmağa planlaştıra, dep bildirdi. Batırılğan paromlar arasında Rusiye arbiyleri inşaatlarnı qoymağa azırlana.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.