Rusiye ordusı Herson vilâyetinde Kahovka gidroelektrostantsiyasını patlattı, dep bildirdi Ukrayına Cenüp Mudafaa Quvetleriniñ Birleşken matbuat merkeziniñ reberi Natalâ Ğumenük Azatlıq Radiosına bergen izaatında.
«Patlatuv olğanını ayta bilem. Al-azırda dağıluv büyükligi, suv süratı ve ölçüsi, basa bilecek rayonlar baqıla. Bütün hızmetler çalışa. Gidroelektrostantsiya işğalciler tarafından patlatıldı», – dep qayd etti o.
Herson vilâyetiniñ arbiy memuriyet yolbaşçısı Oleksandr Prokudinniñ aytqanına köre, 5 saattan soñ suv kritik seviyege kelecek, telükeli rayonlardan sakinler tahliye etilip başlandı.
«Sol tarafnıñ sakinlerine ayrıca muracaat etem: özüñizni ve ayatıñıznı telükeden uzaq tutmaq içün eliñizden kelgenini yapıñız – acele bir şekilde telükeli yerlerni terk etiñiz», – dep qoştı o.
Memur yerli sakinlerni ilk ihtiyac eşyalarını toplap, tahliye avtobuslarını beklemelerine çağırdı.
İçtimaiy ağlarda patlatılğan dambanıñ videosı tarqatıla – olğan yerde küçlü suv aqımları körüne.
Herson vilâyetiniñ arbiy memuriyeti Dnipronıñ sağ tarafında suv basa bilecek yerlerni ayttı. Mıkolayıvka, Olğivka, Lvove, Tâğınka, Ponâtivka, İvanivka, Tokarivka, Pridnestrovye, Sadove köyleri ve qısmen Herson şeeri – Korabel adası.
Nova Kahovkanıñ Rusiye yolbaşçısı Vladimir Leontyev başta «şeerde er şey yahşı, tınç» aytsa da, soñra gece saat ekilerde «Kahovka gidroelektrostantsiyasına çoq darbe endirildi, neticede «mandallar» bozuldı», dep bildirdi.
«Kahovka suv anbarından su kontrol etilmegen bir şekilde aqıp başladı», – dep qoştı o.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.