2005 senesinden başlap, Rusiye Federatsiyası er yıl Aqyarda Rusiyege qoltutqan teşkilâtlarnıñ işine 2-3 million dollar yatırım yapıp keldi. 2014 senesi Ukrayina tarafdarı aksiyalarınıñ faal iştirakçisi Dmıtro Bilotserkovtsniñ fikirince, tamam o vaqıt şeerniñ Rusiye tarafından melez işğali başlandı.
Bilotserkovets Qırım.Aqiqatqa bergen tarif etkenine köre, para Nahimov meydanındaki "Moskva evi" vastasınen tarqatıla edi, o, Moskvanıñ Aqyar şeer memuriyetiniñ filialı edi. Bu qurulışlarğa resmiy destek berilmesi Yuriy Lujkov zamanından başlandı.
Bilotserkovetsniñ aytqanına köre, maliye miqdarı aqqında malümat, bu resurslar içün küreşken Rusiye ve Rusiye tarafdarları olğan teşkilâtlar arasında sert reqabet neticesinde belli oldı.
"Er şey nasıl başlandı? Er şey 2005 senesinden başlandı, Rusiye er yıl Rusiyege qoltutqan teşkilâtlarğa 2-3 million dollar ayırıp başladı. Bizge bu nasıl belli oldı? Mesele şunda ki, Rusiye ve Rusiyege qoltutqan qurulışlar bu maliyelev içün sert bir şekilde yarışa ediler. Olar paralarnı Aqyar şeeriniñ merkeziy meydanında yerleşken "Moskva evi"nden ala ediler. Lujkov zamanından berli bu para resmiy olaraq Rusiyege qoltutqan teşkilâtlarğa ayırıla edi", — dep tarif etti Aqyarlı Dmıtro Bilotserkovets.
RF Aqyarnı nasıl işğal etkenini ve Ukrayin şeeriniñ ne vaqıt zapt etilmesi aqqında tafsilâtlıca Qırım.Aqiqat tele leyhasınıñ yañı yayınında seyir etiñiz.